چاققانا(2)
«سعداله دنیوی»نین
«منیم آدیم قاریشقادیر، قاریشقا» آدلی شعرینه بیر ناخیش
«آددیملاییرام/ اوشاقلیق خاطیره‌لریمی/ اؤزومه بیر انیشتن ایدیم/ دوغو دویغولو/ بؤرکومو قولاغیماجاق چکیب/ آراییردیم آرزولاریمی/ دال چئویریب بوتون گولونجلره/ ائشیردیم/ ائشینیردیم/ گؤزومون قیراغی ایله آنلاییردیم/ پیچیلتیلاری/ دامیردیم ایچیمه/ آسئت کیمی یاندیریردی جانیمی/ آلئرژی توتموشدوم/ برلی بزکلی قوخولارا/ کوت شالواردان اییرنیب/ ساری تئللی قیزلارا دئییردیم/ جهنم اولون!/ باخیشلاریزا اوخ/ قارنیزدان آجیغیم گلیر/ او سیز/ اودا قارپیز/ به نئیلیم اینانمیرسیز/ من بویام/ باشماق تایی اسیری/ ائله اروپادادا وار آمریکادادا/ فیلیملرین بیرینده گؤردوم/ بیر نفر/ ایتین یئمهیینی قاپدی/ کئف ائلهدیم کئف/ منه بتر یاپیشدی/ گؤزلریمدن آسیلیب قالدی/ اورهیینین باغیرتیسی/ مارکینی بیلمهدن/ دوستاق بویالی پالتارینا دالدیم/ کیشیلندیم/ کوزئت دوغدوم/ قاندیدان اوزاقلاشیب/ یاشا دولدوم/ یاشاسین یاشاسین دئیه- دئیه/ یاشا... سین آنلادیم/ آددیملادیم/ بورلا خاتین ایله/ شَهَر یئرینی/ اللریمی آتالاریمین چیینینه قویوب/ شکیل چکدیردیم/ قانلاری شاهداماریمی اودلادی/ گؤزلرینه باخدیقجا/ آغیزلارینین اولماماغینی دویدوم/ سوکوت گؤودهلرینی چارتلاتمیشدی/ چیچک بانیدان بیر آز اوزاق/ اؤزومو گؤردوم/ همن قوخولار همن آرزولار همن فیلیم/ دوداغیم بوزولدو/ گؤودهم چارتلادی/ هه دوز گؤرموشم اؤزومم اؤزوم/ سسسیز سمیرسیز ییخیب یارادان/ اَل چالیب آلقیشلایین/ قیرمیزی خالچایا آیاق قویوب/ گلمیشم تریبون آرخاسینا/ منیم آدیم قاریشقادیر، قاریشقا»
رامین جهانگیرزاده
شعر ایلک آددیمدا اوشاقلیق خاطیرهلریندن باشلانیر. شاعیر اوشاقلیق خاطیرهلرینی آددیملاییر. هر نهدن اؤنجه شاعیرین نئجه آددیملاماغی بورادا بیر آز ماراقلیدیر. او اوشاقلیق خاطیرلرینی آددیملایارکن اؤزونو انشتین کیمی گؤرور. ایشیق سورعتیله زامانین معادیلهلرینی بیر ـ بیرینه وورور. ایشیق ایری ـ مویرولهنسه ده، شاعیرین قانیندا ذره ـ ذره یئرییر. دوشونجهسینی حیصارا چکیر. آنجاق او اؤز سویونو ایتیرمیر، دوغو اولدوغونو اونودا بیلمیر. دوغودا یاشایان اینسانلارا تای بؤرکونو قولاغیناجاق چکرکن آرزولارینی آختاریر. آرزولاریندان ال چکمیر. کئچل زامانین تپهسینه بیر قاپاز ووروب، یئنی نظریهلری ثبوت ائتمک اوچون هر نهیه ال آتیر. آرزولارینین ذرهلرینی کشف ائدیب، یئنی بیر فضایا سالیر. آرزولاری دهییشیر، یئنی بیر شکیلده جانلانیر. شاعیر اوخویور«آی منیم آرزو قیزیم! آرزو قیزیم»
شاعیر اوخویا ـ اوخویا دالینی هر نهیه چئویرسه ده، گولوشلر دوداغینا قونماسا دا، آنجاق انتشتین کیمی دیلینی چیخاردیب، ائشمکدن و ائشینمکدن ال چکمیر. چکمهسینی گئییب، هر یئری آختاریر. هردن ده بیر تاپیل ـ تاپیل پول وئریم تاپیلماسان کول وئریم دئیه نهسه آختاریر، آنجاق بیر شئی تاپمادیغی اوچون ائشدیکلری کوللری، تاپمادیقلاری شئیلره پای وئریر. شاعیرین وئردیی پای یالنیز بیر اووج کول سویوغو اولور. شاعیر کوله چئوریلیر، سویویور. آنجاق بو سویوماقلارا باخمایاراق شاعیر هئچ نهیه گؤزونو یوممور، هر بیر پیچیلتیدان قوپان سسین نه اولدوغونو درحال آنلاییر. هئچ نه اونون گؤزوندن قاچمیر. گؤزونون قیراغی ایله ده اولور اولسون، پیچیلتیلارین نه اولدوغونو آنلاماق زوروندا اولور.
شاعیر فیزیکی تغییراتدان سونرا آسئته چئوریلیب، اؤز ایچینه دامارکن، اؤز ایچینی یاندیریر. او یانیر، یاندیغی جیسمینین ایچیندن یئنی بیر شاعیر دوغولور. بلکه او بونو دئمک ایسته ییرکی:« ایچیم اؤزومو یاندیریر چؤلوم اؤزگهنی» هر حالدا بورادا فیزیکین حضورو گؤرونور.
شاعیر آسقیراندان سونرا، سقیراغین نه درهجه ده کوت ـ شالواردان اییرهنیب، ساری تئللی قیزلارا جهنم اولون دئسه ده، آنجاق اونلارین باخیشلاریندان قاچا بیلمیر. اوخلارینی تولازلاییب، گؤزلرینه تاخیر. ساری تئللی قیزلارین گؤزلری چیخیر. شاعیر داها اونلارین گؤزلرینه باخمیر، ساری تئللی قیزلارین قارینلاری شاعیرین گؤزلرینده، قارپیز گؤرکمینده گؤرونور. قارپیزلار اونون گؤزونو قاماشدیریر. بورادا شاعیرین ساری تئللی قیزلارین قارینلاریندان آجیغی گلدییینین ندنینی اوردان بیلمک اولار کی اونون آلدیغی بوتون قارپیزلار یا کال چیخیبدیر یا دا خاراب. هر حالدا او قارپیزدان یارالیدیر. قارپیزلار کال چیخماسایدی هئچ واخت او ساری تئللی قیزلارین قارینلاریندان آجیغی گلمزدی و اونلارین اینانیب، اینانماماغینا مین بیر دلیل گتیرمزدی. هله بو آجیغی گلدیینی اونلارا آنلاتماق اوچون آیاقلارینی گؤسترمهیه مجبور اولوب. باشماق تایی اسیری اولدوغونو و باشقا اؤلکهلرده ده اونون کیمی باشماق تایی اسیری اولانلاری آچیقلایارکن. یئری گلنده قیچلارینی دا گؤسترمزدی. او اوتانمازجاسینا شالوارینی دیزینهجک چکیب، هئچ نهدن اوتانمیر، هله آیاقلارینی دا گؤستریر. ایتیردیی باشماق تایینی آختاریر.
ایتیردیی باشماق تایینی گزمکدن یورولاندان سونرا، شاعیر فیلیمه باخیر، او فیلیمده بیر نفر ایتین یئمهیینی قاپاندا کئف ائلهییر. سؤیوندویوندن هئچ بیلمیر نه ائتسین. بورادا شاعیرین فیلیمباز اولدوغونو آنلاماق اولاریدینجا آ. آنجاق بیر نفر ایتین یئمهیینی قاپاندا کئف ائلهمهیی بیر آز دوشوندوروجودور. اونون کومونیست اولدوغو بیر آز بیزی شککه سالیر. هر ایت بو راحاتلیغا یئمک تاپا بیلمز. بو ایتین جینسی ده فرقلیدیر. یالنیز وارلیلارین بئله ایتلری اولا بیلر. یوخسا کاسیبین ایتی آجیندان قارنینی کوله سورتر. اونون وارلیلاردان آجیغی گلیر و وارلیلارین ایتلرینین آغزیندان یئمهیینی هر کیمسه قاپاندا کئف ائلهییر. کئف اوستونده کئفه باخیر. کئفی پوزولمور. کئفیندن بوی آتیب، گؤزلریندن ائشیدیر.
شاعیرین گؤزلری قولاغا چئوریلیر. دوستاق بویالی آدامین اورهیینین تاپپیلتیسی، شاعیرین قولاغینا ایلیشیر. بلکه ده باشقا بیر یؤندن باخاندا شاعیرین بورادا کیپریکلرینین اوزون اولدوغونو باشا دوشمک اولار. مارکینی بیلمهدیی اوچون دوستاق بویالی اولان آدامین پالتارینا دوشونور. ائستاتیکا باخیمیندان دوستاق بویالی پالتارین رنگی شاعیری ماراقلاندیریر. شاعیر مارکلارا آلدانمیر. مارکلارین قوندارما اولدوغونو آنلاییب،. هر نهیین چینی اولدوغونو دوشونور. چینی مارکلار اونون بوتون یاشاییشینا کؤلگه سالیر.
شاعیر فیلمه باخیب، کئف ائلهیندن سونرا، کیشیلنیر. عصریمیزین ژانواژانی اولور. یئنی بیر کوزئت دوغور. کوزئتی بؤیودور، بویا باشا چاتدیریر. سونرا اره وئریر. کوزئت اری ایله یولا گئتمیر. کوزئت ائوه قاییدیر. کوزئت شاعیری بئزدیریر. شاعیری کیشیلیکدن سالیر. شاعیر یولا دوشور، قاندی خیابانیندان باشینی گؤتوروب قاچسا دا، ساچلاری آغاریر، هردن ده بیر اوز ـ اؤزونه«دئیرلرکی دؤزنمدهدی کوزئته، آغارمایین آی ساچلاریم آغارمایین» اوخویوب یاشاییشینین سینماسیندان گیلئیلهنیر.
یاشاییشیندان گیلئیلهنه ـ گیلئیلهنه شاعیر قوجالیر، الینه چلیک گؤتوروب، بیر دن ـ بیره باشینا هاوا گلیب،غارمایین:: غارمایین بورلاخاتینی، ددهنین کیتابیندان اوغورلاییر، شهر یئرینه آپاریر. اونونلا بیرلیکده شهر یئرینی آددیملاییر. هردن ده بیر یادیگار اولاراق اللرینی شهر یئریندهکی داشا چئوریلمیش آتالارینین چیینینه قویوب شکیل چکدیریر. داشا چئوریلمیش آتالارینین قوروموش قانلارینی گؤرنده، شاه دامارینا اود دوشور.
دامارلاری اودلانیر، جانینا قیزیشما گلیر. اونلارین گؤزلرینه باخیر. آغیزلارینین اولماماقلارینی دویور، گؤودهلرینین چارتلاتماغینی گؤررکن بئله حیس اولونور کی دویونجاق اوتوروب آغلاییر. بیر آز بوشالیر. هله بونا راضی اولمور، چیچک بانییه ده گؤز قویور. چیچکبانیدن اوزاق دوشمهیی اونو بیر آز سارسیدیر. اؤزونو چیچکبانینین یانیندا حیس ائدیر. هر نه فیلیم کیمی گؤزلریندن سووشور. آرزولاری یئنیدن چیچکلهنیر. دوداغینی بوزوب، بیر آز کوسور. گؤودهسی چارتلاییر. روادبیردن بیره، قیرمیزی خالچانین اوستوندن یئریییب، تیریبون آرخاسیندان باش چیخاردیر. شاعیر یوخ اولور. کیمسه اؤزونو اؤزونو تقدیم ائدیر« منیم آدیم قاریشقادیر، قاریشقا!» هامی ال چالیر، بیر اووج شکر تؤکوب، بو قاریشقانی آلقیشلاییر. قاریشقا شکرین ایچینه باتیب، شیرینلشیر. آنجاق هامی ـ شاعیر هارا یوخا چیخدی ـ دئییر. کیمسه تیروبونا ساری اللرینی اوزادیب ـ باخین! باخین! شاعیرین باشماق تاییسی تریبونون اوستونده ـ دئییر. قاریشقالار شاعیرین باشماق تایینا سوزولور.
یازماسام ایچیمده کی کلمه لر بئینیمی دلیک دئشیک ائدر. یازیرام بلکه کال کلمه لریم یئتیشدی و کیمسه یه دادلی گلدی و .....