«دومان اردم»ـین «منه قال دئمه!»شعرینه بیر ناخیش

رامین جهانگیرزاده

 

ایلک اؤنجه دومان اردمین «منه قال دئمه!» شعرینه بیر نظر سالیب، بو شعرین باجاسیندان ساللاناق. 

 

«منه قال دئمه !

سندن داها ديکتاتور يوللارين کئفلی ويراژی/ تام منطيقچی بو قيرميز رنگلی مرسدس ياشام/ باسماليديرسا باساجاق قازيما/ دئسن کی گل محررمليک گئجه­لرينده/ باخيشديقلاريميزدان دانيش/ دئسن کی داها يالنيزام - بوشونا وئر/ يالنيزليغين بيريکديريلميشيدی باخيشديغيميز شيشه­لر! بيزه داها ياخين بيزدن !/ قوی منيم چاييم سوزولمه­سين کافه­لری/ دؤنَريم کسيلمه­سين/ بيليتيم باشقاسي­نی ساتسين اوتوبوسلاردا/ و دانيشماسين قجَر نوستالژيسي­نی تبريز گؤزلريمده/ اونسوزا دا اوستوراق ياريشماسی وار تينلرينده/ نه ازيلميشلری دانيشاجام سنه بير ده/ قوی اؤلسون گئجه قوندولاريني چوروسون نعشه­لييينده/ شهنازدا قاپانجی يئتيم­لر چکسين آغيرليغي­نی تبريزين، منه نه/ منی يول­لار آپارمير اؤلومه/ آجليق آپارمير/ حيات آپارمير/ بير گئجه سئويشديم سنی/ آيريليغی حامله قالدين/ دوغ بالامی کاکتوسوم/ ياتاغيميز آلتدا بيلمه­دين سئويشديلر، ياتديلار، بيتيشديلر/ کؤلگه­لر/ اؤلوم دوغدو/ کؤلگه­نه آياق باسما/ بودا بير قورغو/ منه قال دئمه! گل بير آخشام اوستونو يئني­دن سئويشک! سن اللريندن توت منسه....گل اؤلومو ائدَک/ يوخسا گئديرم آل/ پوستلا قايتارارام ائوينه/ مه­مه­لرينی، اللرينی و اوراني/ باغيشلا کؤهنَلتسم کاکتوسوم/ منيمکي ده سنين اولسون/ مندن خاطره»

 

بو شعرده زامان و مکان ال ـ اله وئریب و شاعیرین بوردان اورا، اوردان بورا آتلیماغینی گؤستریر. شاعیر ائروتیک بیر فضانین ایچینده شعرینی قاباغا آپاریر. گاه سیاست اله آتیر گاه ایقتیصادی دورومللارا، گاه دا ساتقینلاردان دانیشیر. دئمک شاعیر هر نه دن دانیشیر هئچ نه اله گتیره بیلمیر. گاه میخا وورور گاه نالا. میصراعلار سینیق سالخاق بیر تابلو کیمی آدامین گؤزلرینده جانلانیر. هر کلمه چیغیر باغیر سالیر. قاتماقاریشیق بیر فضا.  ائله بیل کی زنانه حامامینا دوشموش اولورسان بو شعری اوخویاندا.

بو شعرین باشلانماسیندا، باشینی ایتیرمیش شاعیر، دیکتاتور یوللاردا کئفلی کئفلی ویراژ وئرنده، اونون تام منطیقسیز یاشامینی بیزه آنلادیر. منطیق هاردان باشلانیب و هاردا قورتارا بیلر. بونو اونون آدلاندیردیغی قیرمیزی رنگلی مرسدس یاشامدان آنلاماق اولار. شاعیر یاشامی قیرمیزی رنگلی بیر شرابا بنزه­دیر. قازینا کیم باسیر؟!! بو قیرمیزی مرسدسه بنزه­ین شراب سورعتله اونو هارا آپاریر؟!!  شاعیر یولا دوشور محررملیک گئجه­لرینه یئتیشیر. هر ایل محررمچیلیکده قیزلارلا اوغلانلار بیر بیریلرینه گؤز آتیب، تئلئفون نومره­ وئرمکلری یادیما دوشور.  بوردان آنلاماق اولور کی شاعیر همن آنلاردان دانیشماق ایسته­ییر. آنجاق نه دن دانیشماق ایسته­ییر محررملیک گئجه­لرینده؟!! بیر قیزا گؤز آتماسیندان دانیشماق ایسته­ییرمی یا ...!

عؤمرونون یاری حیسسه­سی کافه لرده کئچن شاعیر البتده کی دئیه جک:« قوی منيم چاييم سوزولمه سين کافه­له­ری» سوزلسه هر نه کافه­لرین ایچینده محو اولوب و شاعیر ده اونونلا برابر سوزولوب محو اولاجاق. کافه­لر شاعیرین عؤمرونو اوغورلاییر و شاعیر اونا گؤره کافه­لردن گیلئی­له­نیر.

دؤنری کسیلمه­ین شاعیرین بیلیتی، باشقالارینی اوتوبوسلاردا ساتماغینی و اونون گؤزلرینده قجر نوستالژیسینی دانیشماماسینی تبریزدن ایسته­دیینی یاخشیجاسینا دویماق اولار. تبریز گؤزلرینه دولور. گؤزلرینده دانیشیر و اوزون زامانلاری اونا آنلادیر. آنجاق شاعیر تبریزه ـ واز کئچ بو احوالاتدان!ـ دئییر. آنجاق تبریز نئجه واز کئچه بیلر؟!! نئجه جیسمینده جیزیلمیش خاطیره­لری پوزا بیلر؟!! قجرین بیغی بورما شاهلارینین بیغلاری هله ده، کافه­لرده قورولداییر. کافه­لرده توستوله­نیر و شاعیرین گؤزلرینه دولور.

شاعیرین اوستوراق یاریشماسیندان سؤز آچماسی، اوستوراغین قولونجا ربطی اولدوغونو گؤستریر.   اونا گؤره ده ازیلیب، بوزولنلردن دانیشماق ایسته­مه­سه ده، گئجه قوندولارین چورویوب نعشه­لیینده اؤلمه­یینی ایسته­ییر. بئله بیر شاعیری او یوللار، آجلیق لا حیات، اؤلومه آپارمایاندا، شهنازدا یئتیملرین آغیر موصیبتی نه وئجینه.  

بیر گئجه ده سئویشیب، سونرا «آیریلیغی حامیله قالدین» دئین شاعیر، کاکتوسوندان بالاسینین دوغولماسینی ایسته­مه­یی بیر آز یئرسیز اولور. چونکو یاتاغینین آلتیندا سئویشرکن، یاتیب بیتیشنلر اولور.

ندن کؤلگه­لر اؤلوم دوغور و ندن سئوگیلیسیندن کؤلگه­سینه آیاق باسماماسین ایسته­ییر شاعیر؟ بورادا کؤلگه­لردن قورخور، کؤلگه­لرین اؤلومجول اولدوغونا دؤزه بیلمیر و بونو بیر قورغو کیمی بیلیر. بو قورغو اونون حیاتینا کؤلگه سالیر. شاعیر حیاتی سوله­نیر. سومسونور هر یئری. هر یئردن باش چیخاردیب هئچ یئره یئتیشه بیلمیر.

اوتانمازجاسینا یئنه ده «منه قال دئمه!» دئییر بیر یاندان دا، یئنی­دن آخشام اوستو سئوشمک زوروندا اولور.  بو لاپ فاجیعه­دیر. شاعیر یئنه ده سئوگیلیسیندن ایسته­ییر کی اؤلومو ائدک!! یانی نه؟!! هئچ آنلاماق اولمور. آخی بونا دئین یوخدور. آی باشی داشلی شاعیر اؤلومون نه­یینی ائده­جکسن؟!! هر حالدا اؤلومه نه ائتسه اؤلوم اوندان ال چکن دئییل. آنجاق بو شاعیر بیلمه­لی­دیر کی اؤلمک بیر فاجیعه اولسا یاشاماق مین بیر فاجیعه­دیر.  

گئتمک بیر بهانه­دیر. شاعیر گئتمک ایسته­ییر آنجاق بیلمیر هارا؟!! بلکه ده، جولفانین یانی آرازین دیبینده یئرلشن شوراقلیق «شوجا» آدلی کندینه گئدیر شاعیر! گؤره­سن شاعیره نه اولدو، بو تبریزده کیم نه دئدی، کیمین ایتی قاپدی اونو؟!! بیلسه­یدی باشینی ایتیرمزدی شاعیر. بلکه ده، باشینی ایترمه­سه­یدی هئچ بیر میصراعنی یارادا بیلمزدی شاعیر. هله سئوگیلیسینه هده قورخو گلیر و اونا  پوستلا مه­مه­لرین، اللرینی و اوراسینی قایتارماغینی­سؤیله­ییر.(گؤره­سن «شوجا»دا پوست وار؟!!) پوستچو یالنیز بیر دؤنه قاپینی دؤیور و شاعیر مه­مه­لرینی، اللرینی و اوراسینی یوللایا بیلمیر. شاعیرین الینده قالیر ائروتیک اشیاءلار. سونرا بیر تهر یوللاییر اونلاری کاکتوسونا

 ـ «باغيشلا کؤهنَلتسم کاکتوسوم » دئییب عوذر ایسته­مه­یی بیر آز گولونج اولور. شاعیر کاکتوسونون اوره­یینی اله گتیرسین دئیه اؤزونونکونده بیر خاطیره اولسون دئیه یوللاییر اونا. هر نه بوردا بیتیر و شاعیرین اوراسی خاطیره­یه چئوریلیر، آنجاق یئنه ده اؤزو کافه­لری سومسونور و یئنه ده کافه­لر اونون عؤمرونو اوغورلاییر.