AYKOLAR-4

سایکولار - ۴

رامین جهانگیرزاده

 

1

ـ ایکی ایله ایکی دؤرد اولارـ دئدیلر

ـ یوخ! ایکی ایله ایکی بئش اولار ـ دئدی

دئیه­نین سؤزو بیر اولار

دئینلر دئیه­نین سؤزونو ایکی ائده بیلمزلر

ایکی ایله ایکی بئش اولدوغونو باشا دوشمه­لی­دیلر

ایکی ایله ایکی دؤرد اولان دئینلر

 

2

اوچ دؤنه دؤندولر

اوچ دؤنه سؤیوندولر

اوچلره اؤیوندولر

دؤردونجو دؤنه

هر نه­ الدن گئتدی

 

3

هر نه صیفیردان باشلاندی

تکجه تانریدان باشقا

من ائله دوشونورم کی

هر نه باشلاندیغینا قاییداجاق

 

4

بیز چوخالدیق

میلیون میلیون

میلیارد میلیارد

ساییمیز آرتدیقجا

تنهالاشدیق

 

 

5

دئدیلر یئددی

دئدیم هر نه الیمدن گئتدی

الیم قالدی

دئدیلر سککیز

دئدیم هئچ نه­دن قالمادی بیر ایز

دیلیم قالدی

دئدیلر دوققوز

دئدیم اریمه­دی بوز

سئلیم قالدی

دئدیلر اون

دئدیم چیینیمه قون

بئلیم قالدی

اون بیره بیر شئی قالمادی

اون ایکی­­یه گومانیم چاتمادی

اون اوچ ده اؤزونو آتمادی

سونوندا دئدیلر اون دؤرد

دئدیم قاپینی اؤرت

اوتاقدا محو اولدو هر نه

 

6

مانیفیستلرینی گیزلی بیر اوتاقدا

گیزلی حالدا دانیشدیلار:

ـ اونلاری رادیکاللارین آلتینا سالمالییق.

رادیکاللارین آلتینا سالا بیمه­دیلر

رادیکاللار قانادلانیب اوچدولار

رقملر آزاد اولدو

 

7

ایکی ائششه­یین آرپاسینی بؤله بیلمیرلر

اونا بونا قورماقودوق دئییرلر

حئساب کیتابلاری بیر بیرینه قاریشیر

 

8

ـ بیز صیفیردان باشلایا بیلمه­ریک

کؤلگه­میز گودلسه

بیز محو اولاجاییق ـ دئدیلر.

صیفیردان باشلایا بیلمه­دیلر

کؤلگه­لری گودلدی

صیفیرین ایچینده قالیب

اؤز باشلارینا فیرلانیب، گیجلدیلر

 

9

حرفلرله رقملر

بیر ـ بیرینه توققوشدولار

یئنی بیر الیفبا یاراندی

 

KİTAB

رامین جهانگیرزاده­نین اوشاقلار اوچون یئنی بیر شعر توپلوسو  ایشیق اوزو گؤردو

 

 

آیسودا

(اوشاق شعری)

یازان: رامین جهانگیرزاده

رسام: رامین میرزایی

ناشر: ندای شمس

دیزاین: حسین یوسفی سادات

اندازه: خشتی

صفحه: 16

تیراژ: 5000 جلد

بیرینجی چاپ: 1389

قیمت: 800 تومن

شابک: 6-32-2688-964-978

---------------------------

ساتیش مرکزی: تبریز ـ «ندای شمس» نشریاتی

 5540252-0411  & 09147634670

Şellərdə dəlilər-8

شعرلرده دلی­لر  -  ۸

رامین جهانگیرزاده

 

1

او اؤزوندن چیخدی

اوزونه باخیب

اؤزونو اودلادی

بوتون عرب دونیاسینی اود بورودو

اودلار آیاغا قالخدیلار

بودور عوصیانین آنلامی:

هر بیر عوصیان دلی­لیکدن باشلانیر

 

2

دلی­لر شهرینه آیاق باسدیق

چوماقلارینی دیک توتدولار

بیز ده دیک توتدوق چوماقلاریمیزی

 

3

بیز بیر نئچه نفر دلی ایدیک

داشا میخ چالیب دلیردیک

بو عجیبه ایدی

میخ داشا باتماسایدی دا

داش میخا باتیردی

 

4

منی قینامایین

بو آداملار چوخ گولمه­لی­دی

اونلار گولنده دیش حکیمی یادیما دوشور

گؤره­سن قوردلار دیشی یئینده

دیش حکیمین کیم اولدوغونو آنلاییرلارمی؟!!

 

5

اینسان دلی اولاندان سونرا آدام اولور

حئییف کی

بیز دلی اولا بیلمیریک

سئنسورلاریمیزی ده­ییشسز

بیز ده دلی­لره قوشولاریق

 

6

اونا دیجیتالی آج خوروز دئییردیم

او دیجیتال اولمامیشدان قاباق

دلی­لییینین سون آنلارینی یاشاییردی

واختیندا بانلاماسایدی دا

هئچ اولماسا بانلاییردی

 

7

یئددی دؤنه بورنونو قورتدالادی

بورنوندان بیر شئی چیخمادی

قولاغینی قورتدالادی

دلی­لر قولاغیندا سسله­نیردی

صاباح هاوا قاریشیق اولاجاق

هئی ایقتیداردا اولان عالی­جنابلار

دمیر پالتار گئیمه­یی اونوتمایین!

 

Şel Silver Stein

شئل سیلوئر استاین

 

 

(او «منی ایچ» شوشه­سینی باشینا چکدی

بیردن بیره بؤیودو

«منی تامسین» بوشقابیندان یئدی

بیردن بیره خیردالدی

بئله­لیکه او ده­ییشیلدی

آنجاق باشقالاری

هئچ نه­یی سینامادیلار)

«شئل سیلوئر استاین»

 

رامین جهانگیرزاده

 

شاعیر، یازیچی، کاریکاتورچو و آمئریکالی موغنی، شئل سیلوئر استاین 1932 ـ جی ایل، سپتامبرین 25 ـ ده شیکاگودا دونیایا گؤز آچیر. 1999 ـ جی ایل دونیاسینی ده­ییشیر.

سیلوئر استاین اوشاقلیق چاغیندان رسم چکمه­یی و یازماغی یاخشی­جاسینا باجاریردی. او اؤزونو بئله تانیتدیریر:

«12 ـ 13 یاشیمدا گوجلو بیر بئیس بال اویونچوسو اولماق آرزیسیندایدیم. سئویردیم قیزلار منی خوشلاسینلار. آنجاق نه بئیس بال اویناماغی باجاریردیم نه ده رقص ائتمه­یی خوشباختلیقلا قیزلار دا منی خوشلامیردیلار. بونا گؤره کاریکاتور چکمه­یه و یازماغا اوز گتیردیم. هئچ بیر کسدن تأثیر آلمادیم، اؤزوم یازیب، اؤزومو یامسیلادیم. هئچ بیر اؤرنه­ییم ده اولمادی.

باشقا یازیچیلار و صنعتکارلارلا هئچ بیر ایلگیم اولمادان یئنی بیر فضادا یئنی بیر رسم­لر و یازیلار یاراتدیم. اؤزومه مخصوص اولان یازیلار و رسملر. 30 یاشیمدا باشقا یازیچی­لارین یازیلارینی اوخویوب، اونلارلا تانیش اولدوم.

اومیدیم وار بوتون اوخوجولار هر یاشدا اولور اولسون منیم یازیلاریمدان لذت آپاریب و اؤز ایستکلرینی بورادا تاپسینلار. بو چوخ ماراقلی اولار ، منیم اوچون یوخ بلکه اوخوجولار اوچون.

ایسته­ییرم باشقالاریلا ایلگی­ده اولام آنجاق اوره­ییم ایسته­دیی کیمی»

شئل سیلوئر استایننین یازیلاریندا اولان گؤزللیک اؤزونه مخصوص اولان بیر خاراکتئر داشیییر. او دونیایا یئنی­دن باخیب، هر نه یی اؤزونه مخصوص اولان یئنی بیر باخیشلا یازماغا باشلاییر.

سیلوئر استاینین ان مشهور یازیلاری اوشاقلارا گؤره یازدیغی اثرلردی. او اوشاقلارا گؤره یازسا دا، یازیلارین هر بیر یاشدا اولان اوخوجو اوخویارکن لذت آپاریر. اونون یازیلاریندا اولان یئنی بیر فلسفی باخیش اونو باشقا یازیچیلارلا تام فرقلی گؤستریر.

سیلوئر استاین اؤزونو هئچ نه­یه باغلی بیلمه­ییب، هر ندن آزاد اولماغی ایسته­یرکن، اؤزونه مخصوص اولان یئنی بیر فورم یارادیر. ساده و ساتریک بیر دیل ایله اوخوجولارینین اوره­یینی اوولاییر. بو اووچو هرنه­یی دوزگون آنلاییب اوخوجولارینین یاشینا باخمایاراق اونلاری یازیلارینی اوخوماغا مجبور ائدیر. هر بیر یاشدا اولان اوخوجو شئل سیلوئر استاینین یازیلارینی اوخویوب اؤزونون سیماسینی اورادا گؤررکن لذت آپاریر.

سیلوئر استاین ساتریک و ساده سطیرلرله اؤز ایچینده اولان صداقتی و صمیمیتی اوخوجولارلا پایلاشیر و بونا گؤره اوخوجولار اؤزونو راحات حیس ائدیب اؤزونو اونونلا ایلگی­ده بیلیرلر. بو سیلوئر استاینین یازی اسلوبوندا اولان گوجونه قاییدیر. او اوخوجولاری اؤزلرینه قایتاریب اوخوجولاری یئنی­دن اؤزلرینی اوخوماغا مجبور ائدیر. بو مجبوریت زورلا یوخ بلکه صمیمیت و صداقت و ساده­لیکله اولور.

بورادا ان سئودییم شاعیلردن بیری اولان  شئل سیلوئر استاینین بعضی شعرلرینی چئویررکن اوخوجولارا یئنی بیر لذت باغیشلانسین دئیه اونلاری بو سطیرلری اوخوماغا دعوت ائدیرم.  

آردینی بوردان دا اوخویا بیلرسیز >>-----> سولبیز 

 

  

ادامه نوشته