Diskinərəm uşaqlığımdan

دیسکینه­رم اوشاقلیغیمدان

                                            قیزیمین ایکی یاشی قورتاریب،

                                            اوچ یاشینا آیاق باسدیغینا گؤره…

 

رامین جهانگیرزاده

 

هردن آتا چاغیرار

های وئرمه­ینده آدیمی

«نامین! نامین! های نامین!» دئیه ـ دئیه

منی اله سالار

پیققیلداییب گولر

گولوشوندن گؤزلریم اولدوزلانار

بوتون ایضطیرابلاریم یادیمدان چیخار

چیخارام اؤزومدن

یئیه­رم قارنینی

اینجه قاققیلتیسی دولار ایچیمه

ایچیمده اویانار اوشاقلیغیم

 

هردن باشیمدان یاپیشیب

یولار توکلریمی

منی عصبی ائتمه­یه چالیشار

توتارام پیرپیزلی ساچلاریندان

ـ بوشلا! بوشلاییم ـ دئیه­رم

او یولار، من یولارام

بوشلاماریق بیر ـ بیریمیزی

یولونماز آرامیزداکی مسافه

یولونماز اللری توکلریمدن

یولونماز اللریم ساچلاریندان

بلکه ده بو دونیانین ان گؤزل اویونودور

یولدو ـ یولدو اویونو

 

هردن تیلویزیونداکی اوشاق فیللیمینه باخاندا

من ده اونونلا بیرگه

باخارام باخدیغی فیلمه

دیلله­نر آناسی

ـ داش دوشسون باشووا، اوشاقسان! ـ دئیر

داش دوشر باشیما

دیسکینه­رم اوشاقلیغیمدان

دیسکینه­رم زامانین بو تاییندان

دیک آتیلارام ایکی یاشیمدان

اویانارام 35 یاشیمدا

 

Şerlərdə Dəlilər - 9

شعرلره دلی­لر «9»

رامین جهانگیرزاده

 

1

آدینی سوروشدوم

گولدو

سوی آدیمی دئدیم

 آغلادی

آدیمی سوروشدو

آغلادیم

سوی آدینی دئدی

گولدوم

گولدو، آغلادی

آغلادیم، گولدوم

 

2

او هر گون

قزئتلره باخاندا

قوللارینی آچیب

ژئست توتارکن

گولومسه­ییب

قاباغیمدان سووشوردو

من هر گون

قزئتلره باخاندا

قوللاریمی قیسیب

بوزولرکن

قاشقاباق ساللاییب

آردینجا گئدیردیم

قوللارینی آچیب، ژئست توتدو

قوللاریمی آچیب بوزولدوم

گولومسه­دی

قاشقاباق ساللادیم

قاباغیمدان سوووشدو

آردینجا گئتدیم

 

3

باشماقلارینی قولتوغونا ووروب

شهرین خیابانلارینا آلا وئردی

آغاجلاری قوجاقلاییب

آغاجلارا آغلادی

باخدی شهرین چیرکین چاغینا

باشماقلاریمی گئییب

شهرین خیابانلارینی سومسوندوم

آغاجلارین یانیندا اوتوردوم

 یارپاقلاری دامدی

توستو بوراخدیم خیاللاریما

باشماقلارینی قولتوغونا ووردو

باشماقلاریمی گئیدیم

شهرین خیابانلارینا آلا وئردی

شهرین خیابانلارینی سومسوندوم

آغاجلاری قوجاقلادی

آغاجلارین یانیندا اوتوردوم

آغاجلارا آغلادی

یارپاقلاری دامدی

باخدی شهرین چیرکین چاغینا

توستو بوراخدیم خیاللاریما

 

Kitab

  لورکانین شعرلری چاپ اولدو:

 

آخشام اوستو ساعات بئشده

  فدریکو گارسیا لورکا

اویغونلاشدیران: همت شهبازی

یاییم ائوی: تک درخت، تهران 1391

گرافیست: هادی ارجمند(آتابای)

 

 

فدریکو گارسیا لورکانین سئچیلمیش شعرلری «آخشام اوستو ساعات بئشده» باشلیقلا  همت شهبازی نین چئویریسی ایله تکدرخت یاییم ائوی طرفیندن یاییملاندی.

 «آخشام اوستو ساعات بئشده» آدلی باشلیقلا چاپا حاضیرلانان بو کیتابدا لورکانین: مشهور «ایگناسیو سانچز مخیاس اوچون آغیت» و «یوخودا گزن سئوگی ماجراسی» شعرلرینین چئویریسییله بیرگه بو شعرلر حاقدا ایکی تنقیدی مقاله ده یئر آلیر. کیتابین باشقا یاریسینی دا لورکانین سئچیلمیش باشقا شعرلری چئوره ییر. شعرلرین چئویریسینده اؤزللیکله تورک چئویرمن لری نین چئشیدلی چئویری لرییله بیرگه فارس چئویرمن لرین ده چئویری لری نظرده توتولوبدور.

 

کیتابین یاییم مرکزلری:

موغان: خیابان جمهوری روبروی بیمارستان ارس، کتابفروشی تراختور۰۴۵۲۷۲۳۲۳۲۰

 

تهران- خیابان ولی عصر-میدان منیریه-خیابان راتق-بن بست مرجان-پلاک ۵۵ط ۲.شرکت پخش کتاب آزربای.۰۲۱۶۶۴۹۱۳۶-۰۹۱۲۳۰۶۴۹۱۰

 

ارومیه- میدان شهدا (دروازه شاهپور سابق)-ابتدای خیابان حافظ ۲-مجتمع تجاری آذربایجان-پلاک ۱۸ نشر بوتا-۰۴۴۱-۲۲۲۱۷۷۶

 

Nənəm və Barat

ننه­م و بارات

رامین جهانگیرزاده

 

باراتین اوجباتیندان، ننه­مین ده، سسی چیخدی. چویون کاسانی گؤتوروب، ایسپانلار کیمی چؤمچه­ایله چویون کاسایا چیرپارکن اؤز اعتراضینی آچیق صورتده، اوستو آچیق کندین قالاقلارینین قیراغیندا بیلیندیردی. بوتون کند اهالیسی ننه­مین بو ایشینی گؤرندن سونرا، بیر آز قورخودان دوشوب، اؤزلرینه اورک وئریرکن مئیدانا آتیلدیلار. آت مورتوضون، قیچی قیچینا دولاشدی. دانقیلداتدیغی قارا قازان باشینا دوشوب، فیرلاندی. فئر حسن قاققیلدایارکن، آت مورتوضون باشینداکی قارا قازانا، قارا زنجیرله چیرپارکن، اوخودو:

ـ «آت آتیم، آتما آتیم/ مئیدانی قاتما آتیم/ قازانی آتما باشا/ دور گئدک یاتما آتیم»

آت مورتوض، باشیندان قارا قازانی گؤتورندن سونرا باشی گیجه­لیب، سریلدی تورپاغین اوزونه. گؤی یئره قاریشدی، یئر گؤیه، مورتوضون گؤزلری چیخدی قاشینا.

 قوش مجید، قالاغین باشینا قونوب، اوزرلیکلری گؤتوردو، آتدی جاماعاتین باشینا. باشینی قاشیییب، ـ ماشاللاه! گؤز ده­یمه­سین اینشاللاه! ـ دئدی. ائله او حالدا قالاغ اوچولدو، قوش مجید کرمه­لرین آلتیندا قالدی. بیر تهر اؤزونو کرمه­لرین آلتیندان چیخاردیب، اوز گؤزونو سیلیب ـ آللاه سیزین گؤزوزو نه دئییم ائله­سین، من سیزه گؤره اوزرلیکلری گؤتورب، آتدیم باشیزا! ـ دئدی.

 قارنی یئکه قولو قارنینی قاشییب، قوش مجیده آلا چؤیوروب، ـ داشیمی سالیم باشووا، آخی سنه دئین یوخدو، یئر تاپمیردین قونماغا، آغاجلار سنی گؤرمور ایندی دوشوبسن بیزیم بو یازیق قالاقلارین جانینا! ـ دئدی.

قاسیم، ناخیرلارلا کنده گیردی. گؤردو کی هره بیر شئی گؤتوروب، دانقیلدادیر. اوزونو ننه­مه ساری دؤندریب، ـ آی ننه­قیز یئنه نه اولوب، آیی باتیبدیرمی، گون توتولبمو؟!! بو قدر های کوی نه­یه گؤره­دیر؟!! ـ دئدی.

ننه­م قاسیمی قورخودا گؤروب، دئدی: ـ قاسیم بالا هئچ نه اولماییب، بیز دئموکراتیا یولو ایله اعتراضیمیزی بیلندیرمک ایسته­ییریک، بیزیم ایسپانلاردان نه­ییمیز اسکیکدیر؟!! قازان دئسن واریمیز، چویون کاسا دئسن لاپ اعلاسی! بیز گرک بو باراتی باشا سالاق کی دونیا دئمورکاتیایا قارشی اولا بیلمز. ایندی گئدیب یوخاری کندین کاتتاسی ایله گیزلی صورتده دانیشیق آپاریر! یوخاری کندین کاتتاسی هئچ آللاهی دا تانیمیر نه جور اولور، بیزیم بو کاتتا بارات او دینسیز ـ ایمانسیز کاتتا ایله ال بیر اولوب، اونونلا دانیشیق آپاریر. آند اولسون یئرین ـ گویون آللاهینا، بیز بو ایشی بئله قویا بیلمه­ریک، یوخسا دینیمیز ـ ایمانیمیز هئچ اولوب، قالاقلاریمیز یئرله یئکسان اولار…!.  

قاسیم قاشینی برکیدیب، اؤزونو عاغیللی آدام کیمی آپاراراکن دئدی: ـ بیز بو ایشی باشا چاتدیرماق اوچون، کاتتانی باشا سالمالیییق. دئدیینیز دئموکراتیا چوخدان کؤهنه­لیبدیر. کاتتانین قنیمی، یوخاری اوبادا یاشایان،  قارا حسینعلینین اوغلو­دور. قارا حسینعلی­نین اوغلوندان باشقا هئچ کیم کاتتا ایله باشارا بیلمز. بیز گرک اونا ایمئل گؤندرک، تئز اؤزونو بورا یئتیرسین.

ننه­م قاسیمین ایفاده­سینی گؤروب، دئدی: ـ قاسیم بالا! سن دییه سن ناخیر اوتارا ـ اوتارا عاغلینی ایتیریبسن. آخی قارا حسینعلی­نین اوغلونو من سندن یاخشی تانییرام، او شوغریب­ بوش یئره بیر ایش گؤرمز. گؤزسه ده، بیز قالاقلاریمیزدان ال اؤزمه­لییک. قالاقلاریمیزدان ال اؤزسک، قیشیمیز جهنم اولوب، سویوق بیزی کاردان سالاجاق. اؤزگه­دن بیر های چیخسایدی اؤزونونکونه  بیر چاره ائدردی. اؤزونونکونه های وئرمه­ین اؤزگه بیزیم هاییمیزا قولاق آسماز. هاییمیزا قولاق آسسا دا، بیزی هئیدن­سالیب، وار یوخوموزو اؤزونه چیخاجاق. قاسیم بالا ائله سن او الینده­کی قارا چاینیکین گؤتونه، او قارا چوماغینلا دؤیسن بیزی گؤرر.

قاسیم، ننه­مین سؤزلرینه قولاق آسیب، قارا چاینیکینین گؤتونه قارا چوماغی ایله چیپارکن، دانقیلداتماغا باشلادی.

کاتتا کنده یئتیشن کیمی، گؤزلری کلله­سینه چیخدی. شورگؤز^# ایمانی یانینا چاغیریب، بو های کویون نه اولدوغونو سوروشدو. شور گؤز ایمان دا هر نه­یی ننه­مین اوستونه آتدی.

کاتتا بارات، قاشلارینی دویونله­ییب،  اوزونو ننه­مه ساری دؤندردی،  غضبله­نرکن، دئدی:

ـ آی آرواد! سن گئت اؤز ایشینله مشغول اول! کیشی ایشینه قاریشما! من هئچ بیلیرسن یوخاری کنده نه­یه گؤره گئتمیشدیم؟!! بیلمیرسن ده! من اورایا بئجاها گئتمه­میشدیم کی…! تئررورچولاری نئجه محو ائتمه­یه گؤره و اونلاری سیل سوپور ائتمک اوچون گئتمیشدیم؟!! یوخسا ائله گؤررسن صاباح یئریندن بیری قالخیب، قالخانینی باشیمیزا چیرپدی.

کاتتا سونرا اوزونو جاماعاتا ساری دؤنده­ریب، دئدی:ـ آی جاماعات سیز کیشی­سیز! نییه بو قوجا آروادین سؤزویله مئیدانا آتیلیبسیز، سیزه وئردییم یارانه­لر بورنونوزدان گلسین! بودورمو منیم امک حاققیم؟!!

ننه­م کاتتایا ساری غضبلی باخارکن دئدی:

ـ کاتتا! جاماعاتین باشینا پاپاق قویوب اونلارا کیشی روتبه­سی وئرسن ده، کیشی اولمایاجاقلار کی…. چوخ دا، کیشیلنمه! کیشی اولان قالاقلارین قایدینا قالار. بیر  دسته اوزرلییه باغلی اولان قالاقدان قالاق اولماز. اولسا دا، تئزلیکله یئرله یئکسان اولاجاق. بو گونون صاباحی دا وار. صاباحین قیشی دا. سن اؤزونو ائله آپاریرسان کی ائله بیل هئچ نه اولماییب، وئردیین یارانه­لر­ یاریم گونوموزو اؤده­میر. بیر الدن وئریب مین الدن آلیرسان.   

 

اتک یازی:

# شور گؤز: تویلاردا های ـ کوی سالیب ـ به بو  آروادلارین شامی نه اولدو؟!! ـ چیغیران کیشی­لر.

  

Ölü yuyan

اؤلو یویان

 

رامین جهانگیرزاده

 

هئچ کیم اونون کیمی اؤلولردن لذت آپارا بیلمزدی

اؤلولری ساغ ـ سولا دؤندریب

قابار اللریله بدنلرینی تومارلایاردی

لال باخیشلارینا باخیب

اوره­ک وئریردی اؤلولره:

 

ـ یاتین دوستلاریم یاتین!

اوزانین اؤلوم تاختیندا

یویوندوروم سوپسویوق بدنیزی

یاواش ـ یاواش

ایلمانقی سولارلا

تر ـ تمیز اولون

قورت ـ قوشلار اییرنمه­سین سیزی یییه­نده

چیمچه­شیب آتاما لعنت اوخوماسین قاریشقالار.

آللاه سیزه برکت وئرسین اؤلولر

منیم چؤره­ییم سیزدن چیخیر…

سیز اولمایاندا بئکارچیلیقدان اوره­ییم سیخیلیر

دئپرئس اولورام

 

 

اؤلولری یویوب

آختاریردی  آغیزلارینی

چیخاردیردی قیزیل دیشلرینی

هئچ بیر ذره­ آغری دا بیلمیردی اؤلولر

اؤلولرین سسی چیخمیردی

گؤزلری آچیق اولسا دا

هئچ نه­یی گؤرموردولر

لال اولوب هئچ نه دئمیردیلر

اؤلو یویان دا قورخموردو آدامین اؤلوسوندن

اؤلو یویان بیلیردی کی

اؤلو دیریلن دئییل

اؤلونون باشینا نه اویون گتیرسه ده

دینن دئییل…!

  

Əlli altı saniyə

56 ثانیه…

رامین جهانگیرزاده

 

آدامین قیدیغی گلیر

نفس چکنده

بورنومون اوجو

 قولاغیمین ایچی گیدیشیر

گؤزلریمین ببکلری سولانیر

دوداغیم سه­یریییر

اورام قاشینیر

بورام قاشینیر

بیردن ـ بیره قاققیلداییب گولورم ناحاق یئره

آدام اؤز اوتوردوغو یئرده ده راحات اولا بیلمیر

ائله هئی قوجونور

دینج اوتورمور

اؤلوم سرحدلرینی تانیماق اوچون

بورنومو توتوب

آغزیمی یومورام

نفس آلمیرام

بیر ثانیه

ایکی ثانیه

اوچ ثانیه

ثانیه­لر قاباغا گئدیر

گؤزلریم قارالیر

باشیم گیجه­لیر

بدنیم اسیر

ثانیه­لر منی اؤلدورمه­یه تله­سیر

آغزیمی آچیب

دریندن نفس چکیرم

سونرا ـ وای ده­ده آز قالا اؤلموشدوم ـ دئییب،

ثانیه­لره باخیرام

56 ثانیه…

شوکورلر اولسون هله یاشاییرام

 

ŞEY - ŞÜYLƏR

شئی ـ شویلر

«شئی­لر قاناد چیخارتدی/ شئی­لرین اوستونه قوندو/ شئیلر شئیلره قاریشدی/ بیر شئی چیخمادی/ بیر شئی چیخارتدیق/ بیر شئی اولمادیق/ هر شئیی سارییب،/ هر شئیه شئی قویدوق/ شئیین، شئیی چیخدی/ داغیلدی یئر اوزونه هر شئی/ شئی ـ شویلری ییغیشدیرا بیلمه­دیک/ شئی­لرین ایچینده هر شئی آختاردیق/ هئچ بیر شئی تاپا بیلمه­دیک»

رامین جهانگیرزاده

 

ایندی اوخودوغونوز شئی، بیزیم هر نه­ییمیزی شئی ائدن شئی­لردن باشقا بیر شئی دئییل. بیر شئی اولماسا بیر شئی اولماز. بیر شئیین اولوب ـ اولماماغی بیر شئیین، شئییندن آسیلی­دیر.

هر شئیین اؤزونه گؤره بیر شئیی وار. شئیلریمیزی، شئی ـ شویلرین ایچیندن آییریب، باشقا شئیلرین یانینا قویاندا، بامباشقا بیر شئی اولور. من دئدییم شئی­لر سیز فیکیلشدیینیز شئیلردن فرقلی­دیر. من بیر شئیدن دانیشاندا او شئی­لری یادا سالماق ایسته­ییرم کی بیزیم شئیلریمیزی شئی ائدیرلر. بیر شئی اولماسا نییه بیر شئی چیخاردیرلار. بیر شئی اولوب کی بیر شئی دئییرلر. بیزیم چاره­میز بو شئی­لری ییغیشدیرماقدیر. بو شئی­لری ییغیشدیرماق اوچون بیر نئچه شئی ائتمه­لییک. بیر شئی ائده بیلمه­سک هر شئی باشیمیزا داغیلیب، هر شئییمیز شئیلرین آلتیندا قالاجاق. هر شئیه بهانه گتیرسک، هئچ بیر شئیی یئرینه سالیب، بیر شئی ائده بیلمه­یه­جه­ییک.

بیر شئیی بیلمک اوچون او شئیین، شئی  ـ شویلرینین، شئی­لرینی بیلمه­لی­ییک. او شئی کی گؤزه چارپیر ائله شئی­دیر. داها بیر شئیه بیر شئی چیخارتماق لازیم دئییل. بیر شئی چیخارتماق ایسته­سک او شئیین بوتون شئیلرینی نظرده توتمالییق. بیر شئی بیر شئی اولاندا، بوتون شئیلر شئی اولوب و هر شئی، شئیده قورتاریر. دوزدور کی بیر شئی اولماییب، آنجاق نمه­نه بیر شئیه سبب اولور؟!! بو شئیلرین جاوابی او شئیلرده­دیر کی بیر شئیی اؤز جایناغینا کئچیردیب، بیر شئی ائتمک ایستمکدن قاباق بیر شئی اله کئچیرتمک ایسته­ییر.

بیر شئیه باشیمیز قاریشاندا، باشقا شئیلری اونودوروق. بیر شئییی الده ائتمکله بیر شئیه مالیک اولا بیلمه­ریک، بیر شئیی الدن وئرنده ده هئچ بیر شئی بیزدن آزالمیر. یالنیز بو شئیلرین ایچینده چابالاییب، شیئلرین ایچینده قالیریق.

شئیین اولوب، اولماماغی بیر شئییه ربطی یوخدور، بلکه بو شئی­لرین بیر ـ بیرینه ربطی وار. بیز هر شئی دانیشیریق آنجاق هئچ بیر شئیی نظره آلمیریق.

بیر شئیی دانیشماق اوچون اونا بیر شئی یونتاماق لازیم دئییل، بیر شئی یونتاماتلیییق کی بیر شئییه اوخشارلیغی اولسون. بیر شئییه مالیک اولوب اونا شئی ائتمکله بیر شئی ائده بیلسئیدیک ایندی­یه قدر بیر شئی اولموشدوق. بیر شئی توربامیزدا وارسا، چیخارتمالییق، توربامیزدا بیر شئی اولماسا، یالان یئره بیر شئی چیخارتماقلا بیر شئی اولا بیلمه­ریک.

بیر شئیین فلسفه­سینی آنلاماق اوچون او شئیین هر شئیینی اؤلچمه­لیییک. شئیی هر شئیده آختارماق اولماز. هر شئیی ده بیر شئیدن آنلاماق اولماز. آختاریب آنلادیغیمیز شئیلر هامیسی بیزه باغلی­دیر.

هر شئیی شئیه چکدیک، بیر شئی بیزدن قالمادی. یئرده قالان یالنیز شئیلر اولدو، اونو دا شئی ـ شویلره قاتیب، چرچی­لر آپاردی…