مایکولار - ۳

رامین جهانگیرزاده

 

1

او کؤکونو ایتیردی

یئر کؤکو یئدی

دوشانلار اونا مات ـ مات باخدیلار

 

2

گؤزلرینین آلتیندا بادیمجان اکمیشدیلر

پامادور یئییردی

 

3

ـ گؤر بازارا نه گلیب، گولو بورنوندا گول­به سر!!!ـ دئییب

چیغیریردی مئیوه ساتان کیشی.

او قادینین دیکدابان باشماغیلا تاق توق سالاراق

کئچیردی اوردان

 

4

پارکدا ساری صندلده ایله­شن کیشی

قزئت اوخویوردو

قارغالارین بیری سیچدی قزئتین اوستونه

 

5

آنفولانزا توتموشدو

بیلگی­سایارینا آنتی ویروس نصب ائدیردی

 

6

گؤیده ایکی طیاره بیر ـ بیرینه توققوشدو

پولیس وانئتچی­نی یاخالادی

 

7

شهری توستو بوروموشدو

13ـجو مرتبه­ده اوخویوردو موغنی

«آی دومان گل گئت بو داغلاردان!» ماهنیسینی

 

8

شاعیر شعرلرینی یازیب آتیردی زیبیل قابییا

تیلویزیوندا زیبیللرین نه قدر اؤنملی اولدوغوندان دانیشیردیلار

 

9

سحر چاغی قادین ارینین یویولموش پالتارلارینی ایپه سریردی

قونشوداکی کیشی گئجه یاریسی اؤزونو آسمیشدی