قاریشقا شیللاق آتدی، دوهنین قلبینه دَیدی
آیاق یالین
او زاماندان کی دوه کؤهنه حامامین ایچینده دللکلیک ائدیردی، بیردن بیره قاریشقا اؤزوندن چیخیب شیللاق آتدی. دوهنین قلبینه دَیدی. دوه اؤزوندن چیخدی. هر نهیی چالخالاییب، چیلخاسینی چیخارتماق ایستهدی، آنجاق هئچ نهیین چیلخاسی چیخمادی. الی هر یئردن اوزولدو. یئددی مین ایللیک شرابی سوزوب، کئفلندی، یئنه ده کؤهنه حامامین ایچینده اوتورب دللکلیک ائتدی.
قاریشقا بو احواتدان سونرا، بو دونیادا اؤزونه بیر یئر آختاردی، تاپا بیلمهدی. آغ ملکلی کپینکلرین بئلینه مینیب، آغ پلمهلرده اوتوردو. تانریدان یاغیش ایستهدی. تانری یاغیشینی اسیرگهمهدی. یاغدی یاغیش، قوشلار بانلادی. قاریشقانین احوالاتی بیر آز دورولدو. اؤزونو یاغیشا تاپشیریب، اودلارین ایچینه آتیلدی. آت قاریشقالار دوهنین دللکلییی ایله قاریشقانین جانینا دوشدولر. دوه اوینادی، یئنه ده قار یاغدی، بوران دوشدو، سویوق آلدی هر یئری. بوز داغلاریندان، بوز اؤکوزلر دوشدولر اؤلکهمیزه. ائشدیلر دیرناقلاریلا، بوینوزلاریلا قاریشقانین قارنینی ییرتماق ایستهدیلر. قاریشقانین قارنینی ییرتدیلار. قانینی سووادیلار سوواقلی داملارا. داملارین اوستونده بالاخانالارین ایچینده اوتوران قارا پیشیکلر، بوز اؤکوزلری آلقیشلادیلار. قارا چیچکلر آتدیلار بوز اؤکوزلرین باشینا.
دوه چیخدی داملارین اوستونه، باشلادی دانیشماغا:
ـ هر کیمسه کی کؤهنه حامامین مدنییتینه قارشی چیخسا اونون قانی حالالدیر. بیز گرک موقددساتیمیزی قورویاق. قاریشقالارین حاققی یوخدور شیللاق آتماغا. بیز گرک میللی منافعیمیزین علئیهینه اولانارا آنلاداق کی بانلاماسینلار. گرک بئله قاریشقالارین قیچلارینی سیندیراق.
زامان دایانمادان قارا آتلارا مینیب چاپدی، کؤهنه حاماملار اوچولدو. یئنه ده بیر قاریشقا شیللاق آتدی. بو دؤنه دوه تزه حامامدا دللکلیک ائدنده بودرهدی، قیچلاری بورولدو، اؤز اؤزونه بورولوب، اؤزوندن چیخدی، یئددی مین ایللیک شرابی ایچیب کئفلندی. باباسینی سسلدی…! باباسی قبیرده خورتلاییب دوردو!
ـ هه منیم بالام نه اولوب؟!! نییه بئله کئفلی کئفلی منی چاغیریرسان؟!! ـ دئدی.
دوه ـ منه یئنه ده یئددی مین ایللیک شراب وئر ایچیم. بوتون تاریخیمی کئفلنمک ایستهییرم بابا…!ـ دئدی.
