دیلینی دینج قویمایان، هر قازاندا قاینایان سئویملی دوستوم سؤز آتان!

سنه باش وورماماغیمین سببی چوخدور. ایندی من درین بیر قویودایام. نه قدر چیغیریرام هئچ کیم چیغیرتیمی ائشیتمیر. بیر آز ماز بوغازیم توتولوب، داها چیغیرا بیلمیرم. بورادا هر نه یئرینده دیر هئچ اولماسا قورباغالارین سسی منه تسکین وئریر. بو درین قویودا یالقیزجاسینا یاشاییردیم کی بیردن بیره تاریخین لاپ اوزاق چاغیندان کیمسه باشیما دوشدو. بیر نئچه ساعات هوشدان گئدندن سونرا آییلدیم گؤردوم ماممیل ماتان  بیر اوغلان گولومسه­یرک اللرینی آلنیما قویوبدور. اونونلا خوش بئش ائدندن سونرا بیلدیم کی بو جناب همن زلیخانین دیدرگین یوسفی­دیر. یوسف جنابلاریلا کئچمیش خاطیره­لریمیزدن دانیشدیق. او زلیخادان دانیشدی من ده ساری گولدن. ائله شیرین دانیشیردیق کی کیمسه باشیمیزا بیر داش زوللادی و کیمسه­لر او داشی قویودان چیخارتماق ایسته­دیلر آمما چیخاردا بیلمه­دیلر. او بویدا داش باشیمیزا ده­یسه ده بیلمیرم باشیمیز نییه یاریلمادی. من یوسیفه باخدیم او منه. بیردن بیره ایکیمیز ده چیغیردیق و داشی قویودان چیخاردانلاری چاغیردیق آمما اونلار سسیمیزی ائشیتمه­ییب، یوللارین توتوب گئتدیلر. ساکیتجه اوتورموشدوق. بورادا نه گئجه ایدی نه ده گوندوز. بورادا زامان چاش باش ووروردو. گاه دالی قاییدیردی گاه قاباغا. من درین بیر یوخویا گئتدیم… یوخومدا گؤردوم کی «سئوگیلیم داغ باشیندا اینک ساغیر. اینک منه باخیر آمما او منه باخمیر.»^# یوخومو یوسیف جنابلارینا تعریف ائتدیم. یوسف جنابلاری بیر آز درینه گئدرکن تعجوبله بئله دئدی ـ سئوگیلین سنی سئومیرسه اینک نییه سنه باخیردی؟! بو یوخونون تعبیرینده یوسیف جنابلاری دا قالمیشدی. هر حالدا بو بیر احوالات ایدی. ایندی او بیری احوالاتی سؤیله­ییم. قویویا دوشمه­میشدن قاباق مشه مجنونو صحرادا گؤردوم اونون الینده بیر لپ تاپ وارییدی. یاخینلاشدیم اونا او منی ائله بیل گؤرموردو. مشه مجنون اینترنت دونیاسیندا ایدی. لیلی­نین گؤزوندن ایراق، او بوتون دونیانین قیزلاری ایله چت ائله­ییردی.  آلتی آیلیق اولما هله مکتوبومون آردی سی وار....

امضاء: آیاق یالین