بوراسی گونش کافهسی!
:: آیاق یالین
های کوی سالمایین
کویلنمهسین لاللار
گول – پیچ اویناماغا واختیمیز اولمادان
بورایا ییغیشمیشیق
اؤزوموزو ییغیشدیران اولمادی
سؤزوموزو ییغیشدیران هله آناسیندان اولماییب
قیزیل دیش قفهچی،
آللاهین سسینی قاتیر بو های کویلره
کویلنمهسین آللاه
فندکلر:
چاک!
چاک!
چاک!
چاک! ها چاک!
گوموشو میزلرین اوستونده
بارماقلاریمیز شاهیددیر
کول قابیلار حیاتیمیزی سایاقلاییر
دیوار ناحاق یئره آغزینی آچماییب اسنهیرکن
ـ نارکامانلارین گیریشی یاساق!ـ دئمهییب کی!
دوزونو من لاپ قاریشدیرمیشام
رئال حیاتیملا سورئال حیاتیمی
ـ باغیشلایین فندیینیزی وئرین آلیشدیریم
بو قاتماقاریشیق یاشاییشیمی!
ـ بویورون! مومکون اولسا بیر گیله ده منه وئرین گیلهم!
دئمهلی گولمهیهجک او کونجده ایلشن آغا!
ـ ها! ها! ها!
ـ سیرتیغین بیری سیرتیق!
ـ او کؤپک اوغلو کؤپک ده اؤزونو ساریییب!
مملکتین ایچینه آفتافا گؤتوروب!
ـ توالئته گئدیم بیر باش چکیم گلیم!
ـ تراختور هله قاباقدیر دآآش!
ـ آللاه صمد بهرنگییه رحمت ائلهسین!
ـ امامیه ده دونن بیر قیز اؤزونو یاندیردی!
ـ دوز دئییرسن؟!!
ـ اوچو مین تومن! آلان وارسا…!
ـ ائه بو آداملاردان باش آچا بیلمیرم!
ـ قولو آغزین تؤکولسون یئنه بیر قزئتی باغلادیلار!
ـ ساتقین!
ـ باغیشلا عزیز اوخوجو لاپ سنی اونوتموشدوم!
ایندی باشلاییم سنین اوچون بیر شعر یازماغا
بویور بودا او بیری شعرلره تای
تای با تای
بوراسی گونش کافهسی
بوراسی رومانلا شعرین داوا دالاشی
بلکه ده آللاهسیزلارلا آللاهلیلارین باریشیغی
کمونیست قدئشلریمیز
بومبالاریلا پارتلاداجاقلار بورژوا سارایلارینی!
فرقینه دوشونورم بو تیلیفلی چایلارین…!
دئییرلر ارابهلر بورادان کئچهجک
هئچ بیر پروبلئم یوخ
هر نه دوزهلهجک
ـ آغا چای ایچیرسیز؟!!
یوخ!
آمانین بیر گونودور
بیردهنه ده ایچسم دونیانی پارتلادارام!
پالانیز قئییم دیر سه…
:: بابک زنوزی
بودا بیر دوستوموزون جاوابوندا
اوبیری سی یولداشلار گوذشت ائلللر.
پاه آتونان دانا قاریزماتیغین دا معناسین بولورموش سن؟
بس سن اوزون ائلیت سن ده ائله
عیبی یوخدور هر ائله ائله بیر ایت لازیم دیر
بورا سوز میدانی دیر
بورادا گئچیب آغناماخ لازیم دئگیل
توز سالما
آمما
سوز سال سان عیبی یوخدور
آنجاخ نه قه دَر آنقیرا بولورسن آنقیر
کیمسه نین سوزدئماغونا،
دئمه ماغونا،
نه جوردئماغونا
نییه دئماغونا
تکلیف تعیین ائله مه
نئجه کی اوبیری سی لر سیزه ائله میرلر
سیز او یئرده دئگیل سیز
آنجاخ اوز سوزونزی دئیین
یوکلری بیز بئلیمیزدن آشیردیخ
خوشوزگلیرسه
پالان قوشقونوز قئییم دیرسه
سیز یوکلرینیزی محکم ساخلایین
امما چالیشمایین کی اوبیری سینی یوک لویه سیز
هرکس ائلییه بولسه اوزی بولسون
------------------------------------------------
آچیقلاما:
اوسته کی یازینی عزیز دوستوموز منیم یازدیغیم قاشیق و قاشیفچیلار آدلی یازیمین جاوابیندا یازیب...! عزیز بابک دوستوموزا اوغورلار آرزیلایاراق اونون جاوابیندا آشاغیدا گتیردییم بو یازیم گؤرر…
سیچرادیم اؤزومه
:: رامین جهانگیرزاده
منه ایت آدی قویوب
هورمهییمی،
ائششک آدی قویوب
آنقیرماغیمی
خفتن قاپیب
سونجوق آتارکن
آنلاتدیلار
گؤیرتدیلر
سانجیلاتدیلار
قاپمادیم
سونجوق آتمادیم
گؤیرمهدیم
قارنیما سانجی دولمادی
سیچرادیم اؤزومه
جیرماقلادیم اوزومو
----------------------------------
يئني عصرين قارغيشلاري
◊ بارماقلارين اتدؤين ماشينين بيچاغينا ايليشسين.
◊ ايدز توتاسان سني.
◊ گؤزونه جوش دوشسون هئچ يئري گؤرمهيهسن.
◊ مئترودا قاتارا ميننده، مئترو باشينا اوچولسون.
◊ چکدييين چئکلرين قاييتسين، هئچ دولا بيلمهيهسن.
◊ ان سئودييين فيلمه باخاندا، تيلويزيونون يانسين، فيليمسيز قالاسان.
◊ ساتینا يازي يوکلهينده، هک اولسان اينشاءالله.
◊ موبايلينا ائله ويروس دوشسون، هئچ بير نومرهني توتا بيلمهيهسن.
◊ ساعاتينين قارا عقربهسي سينسين.
◊ يازديغين 100 صحيفهليك مودئرن شعرلرينه قارا جؤهر داغيلسين، كيتابسيز قالاسن.
◊ گؤروم سنين پاسپورتون يئرلي-ديبلي ايتسين، پاسپورتسيز قالاسان، هئچ يئره گئده بيلمهيهسن.
◊ بارماقلارين چوروسون، ايل - اون ايکي آي بير سطير ده يازاماغا تامارزي قالاسان.
◊ آکواريومونون شوشهسي سينسين، باليقلارين جان وئرسين.
◊ پئژو ماشينين، آت آراباسينين آلتيندا قالسين.
◊ كامئرانين ديافراگمينا سيلينمهين لكه دوشسون.
◊ ائويندهكي شومينهنين ساخسيلاري سينيق – سينيق اولسون.
◊ اوچ فاز برق توتسون سني.
◊ فئرده بيشن تويوغون يانيب كول اولسون.
◊ كافيشاپدا ايچديين تورك قهوهسي زهرين اولسون.
Yeni əsrin qarğışları
:: Ayaq Yalın
Barmaqların ətdöyən maşının bıçağına ilişsin
İdz tutasan səni
Gözünə cuş düşsün heç yeri görməyəsən
Metroda qatara minəndə, metro başına uçulsun
Çəkdiyin çeklərin qayıtsın, heç dola bilməyəsən.
Ən sevdiyin filmə baxanda, tilvizyonun yansın, filimsiz qalasan.
Saytına yazı yükləyəndə, hək olsan inşallah.
Mubaylına elə virus düşsün, heç bir nümrəni tuta bilməyəsən.
Saatının qara əqrəbəsi sınsın.
Yazdığın modern şerlərinə qara cöhər dağılsın, kitabsız qalasan.
Görüm sənin pasportun yerli-dibli itsin, pasportsız qalasan, heç yerə gedə bilməyəsən.
Barmaqların çürüsün, il – on iki ay bir sətir də yazmağa tamarzı qalasan.
Akvaryomunun şüşəsi sınsın, balıqların can versin.
Pejo maşının, at arabasının altında qalsın.
Kameranın diyafragmına silinməyən ləkə düşsün.
Evindəki şuminənin saxsıları sınıq – sınıq olsun.
Üç faz bərq tutsun səni.
Ferdə bişən toyuğun yanıb külə dönsün.
Kafişapda içdiyin türk qəhvəsi zəhərin olsun.