+++++++++++

  ایچیمه قیران دوشوب 

  :: سارای محمدرضایی 

گئجه یاریسی آتام دئمیشکن ایچیمه قیران دوشوبدو. گیری گیری قلم آختاریب، یوخسوزلوغومو آغ کاغیذلارلا پایلاشیرام. آیدینا لای لای چالیب، معصوم گؤزلریندن اؤپرکن آرزیلار گئجه­سیندن سؤز آچیرام. جانسیز قولچاغیم ائله سوسوب، سؤزلریمه قولاق آسیر کی اؤزوم اؤزومدن اوشه­نیرم.

آرزیلار گئجه­سی بوتون اؤلولری گؤزومده جانلاندیریر.

نه­نه­مین سورمه­لی گؤزو نئجه منی فرحلندیریر. هر گئجه قیرمیزی ساچلارینی داراییب، هؤرردی. 15 یاشیندا بیر قیز کیمین گوزگوده اؤزون سئیر ائدیب، شیتته­نردی.

یئنه کال اویانمیشام یوخودان. یئنه ایچیمه قیران دوشوبدو. بوتون اؤلولر گؤزومون قاباغیندا دوروبدور. بلکه ده بو گئجه­نی منه قوناق اولاجاقلار.

بو قوجالار هئچ اوشاق دنگیلتیسین خوشلامازلار- دئیه آیدینی یاتیردیرام. سیماوره اود سالیب کیشمیشدن، خورمادان، بیر آز دا آنام چالدیغی حالوادان دوزورم قاباغیما. قوجا نه­نه­م یئنه ده آجی سؤزلری ایله منه ساتاشیب نئجه اوره­ییمی سانجیر.  " بالا سن هله چای دمله­مه­یی اؤیرشمه­ییبسن "  دئییب دوداقلارین بوزور.

قوجا بابالاریم، عمی­لریم، هامیسی حاضیردیلار. قارا گئییم­لی، منه اوخشار بیر خانیم محبتلی باخیشلارین بیر آن دا مندن دؤندرمیر.

اؤلولر قورولتایی منیم قارانلیق اوتاغیمی ایشیقلاندیریب، گئجه یاریسی بوتون ائوه ولوله دوشوبدور.

کیشی­لر یئنه ده هره­سی بیر چئرچیل اولوب، سیاستدن سؤز آچیب گوپلاییرلار. ائله یئکه یئکه گوپلاییرلار کی آدامین آز قالیر گؤزلری دؤرد اولسون.

آرزیلار گئجه­سی یا اؤلولر گئجه­سی! بیلمیرم هانسی دوزدور! آنجاق منجه ایکی­سی ده بیر گئجه­دی یانی بو گئجه!

بو گئجه اؤلولرله چایلاشیب، کدرلریمی پایلاشیرام.

بئناوا بیبیم اوشاقلاری­نین یا سئودییی کیشی­نین نمنئچمجی آروادی­نین فیکرینده اولارکن ائله اللرین قوینونا آلیب کدرلی باخیر کی آدامین اوره­یی پارچالانیر.

آنام همشه منی بیبیمه اوخشاداردی. بیلمیرم نییه؟! آنجاق بو قادینا غریبه  بیر حیسسیم وار.

بو گئجه آرزیلار گئجه­سینده اؤلولرله بیرلیکده شنلیک ائدیرم. بوتون آرزیلاریمدان اونلارا دانیشیرام. و بیر تزه اؤلودن…

اونون قاراسین بو گئجه چیخاردیرام، بوتون اؤلولرین حوضوروندا.

بو گئجه سنین اؤلومونو اعلان ائدیرم. اؤلولر قورولتاییندا تزه بیر اؤلودن، قارا اوزون ساچلاریمی قیرپمادان بیر ده آیلارجا یاس توتدوغومدان سؤز آچیرام.

ایچیمه قیران دوشوب بو گئجه. آرزیلار گئجه­سی بلکه ده اؤلولر گئجه­سی سنی دانیرام.

İçimə qıran düşüb

::Saray Məhəmmədrzayi

Gecə yarısı atam demişkən içimə qıran düşübdü.Giri giri qələm axtarıb, yuxsuzluğumu ağ kağızlarla paylaşıram. Aydına lay lay çalıb, məsüm gözlərindən öpərkən arzılar gecəsindən söz açıram. Cansız qolçağım elə susub , sözlərimə qulaq asır kı özüm özümdən üşənirəm.

Arzılar gecəsi bütün ölüləri gözümdə canlandırır.

Nənəmin sürməli gözü necə məni fərəhləndirir. Hər gecə qırmızı saçlarını darayıb, hörərdi.15 yaşında bir qız kimin güzgüdə özün seyr edib, Şittənərdi.

Yenə kal oyanmışam yuxudan. Yenə içimə qıran düşübdü.Bütün ölülər gözümün qabağında durubdur. Bəlkə də bu gecəni mənə qonaq olacaqlar.

Bu qocalar heç uşaq dəngiltisin xoşlamazlar- deyə aydını yatırdıram. Simavərə od salıb kişmişdən, xurmadan, bir az da anam çaldığı halvadan düzürəm qabağıma. Qoca nənəm yenə də acı sözləri ilə mənə sataşıb necə ürəyimi sancır. "bala sən hələ çay dəmləməyi öyrəşməyibsən" deyib dodaqların büzür.

Qoca babalarım, əmilərim, hamısı hazırdılar. Qara geyimli, mənə oxşar bir xanım məhəbbətli baxışların bir an da məndən döndərmir.

Ölülər qurultayı mənim qaranlıq otağımı işıqlandırıb, gecə yarısı bütün evə vəlvələ düşübdür.

Kişilər yenə də hərəsi bir çerçil olub, siyasətdən söz açıb goplayırlar. Elə yekə yekə goplayırlar kı adamın az qalır gözləri dörd olsun.

Arzılar gecəsi ya ölülər gecəsi! Bilmirəm hansı düzdür! Ancaq məncə ikisi də bir gecədi yanı bu gecə!

Bu gecə ölülərlə çaylaşıb, kədərlərimi paylaşıram.

Benava bibim uşaqlarının ya sevdiyi kişinin nəmneçəmci arvadının fikrində olarkən elə əllərin qoynuna alıb kədərli baxır kı adamın ürəyi parçalanır.

Anam həməşə məni bibimə oxşadardı. Bilmirəm niyə?! Ancaq bu qadına qəribə bir hissim var.

Bu gecə arzılar gecəsində ölülərlə birlikdə şənlik edirəm. Bütün arzılarımdan onlara danışıram. Və bir təzə ölüdən…

Onun qarasın bu gecə çıxardıram, bütün ölülərin hüzurunda.

Bu gecə sənin ölümünü elan edirəm. Ölülər qurultayında təzə bir ölüdən, qara uzun saçlarımı qırpmadan bir də aylarca yas tutduğumdan söz açıram.

İçimə qıran düşüb bu gecə. Arzılar gecəsi bəlkə də ölülər gecəsi səni danıram.

:: دومان اردم

چاغیر بیرگه قاچاق قارانلیغین قاچغین قیزی

شیلتاق بیر فیشقیراقلا سیچرایارام پئنجره­دن

دؤنه­لیم دؤنگه­لری، بورولاق بوروقلاری

کیمیسی یاتاغیندا،اوغورلوغوندا کیمیسی، سئویشمه ده ،توتوشمادا

کؤگس گرک یوللاری بللی بلیرسیز شهرلره

الک ولک ائدک سویوغو، سازاغی

قوربتینی سئوئللنک پارکلارین

سومسونک فهله­لرین،اوتوراجاقلاردا صاباحلایان یولچولارین جئبلرینی

توکانلارین ساندیغینی

بوینونو، قوینونو، بیلگینی قادینلارین، هاراسینی؟

هله دؤغرودان یالنیشدان نؤمره­لر جیزاق تئلئفون کابینلرینده

0914...آرایین.ائوه گلیریک گئجه­لر

بیر قارین چای-چؤره­یه؟ توتون پولونا

گل بیرگه سویوناق گئجه­لر عیاشلارین، اوغرشلرین قوجوسوندا

اپرییک اودوم-اودوم؟ سولوق-سولوق نعشه-خورلار داماغیندا

-ائولریندن قاچیبلار، ایشدیلر. برنامه، ها ها هاای

شوشه­کی  سالسین بیزی گؤرن اینسانلار، بولوارلار...

اومودلانمایاق یاخشی اولاجاغینا هر نه­یین

ایسترسه لاختالانسین یاشام

آغارماسین، یاشارماسین ،سارالماسین آغاجلار

گؤمولسون تورپاغا کیتابلار،شعرلر،شوعارلار

ایتسین قارنیمیزین قورولتوسوندا اینانچلار

من نم هارانین سولچوسو سوسیالیستی نم هارانین تورکچوسو ناسییونالیستی

قاچقینلار...ایست اولانمازلار

ایستلرسه قاچانمازلار

تکی سوسماق وار هر نه­یه قارشی و اینانماماق و باغیرماماق

اؤرنگی؟! یئنیلمیش بیر آغاج آلتیندا گل

سایاق نارین نارین گؤزلریمیزده یاغمورو داملا داملا

- تورک دیلینده نئچه یاغمور ماهنیسی وار؟

یوماق گؤزلریمیزی هر نه­یه

هامیسینی بیردن سؤیله­یک

:: Duman  Ərdəm

çağır birgə qaçaq qaranlığın qaçğın qızı

şıltaq bir fışqıraqla sıçrayaram pencərədən

dönəlim döngələri, burulaq buruqları

kimisi yatağında,oğurluğunda kimisi, sevişmədə ,tutuşmada

kögs gərək yolları bəlli bəlirsiz şəhərlərə

ələk vələk edək soyuğu, sazağı

qürbətini sevellənək parkların

sümsünək fəhlələrin,oturacaqlarda sabahlayan yolçuların ceblərini

tükanların sandığını

boynunu, qoynunu, biləyini qadınların, harasını?

hələ döğrudan yalnışdan nömrələr cızaq telefon kabinlərində

0914...arayın.evə gəlirik gecələr

bir qarın çay-çörəyə? tütün puluna

gəl birgə soyunaq gecələr əyyaşların, oğrəşlərin qucusunda

əpriyək udum-udum? soluq-soluq nəşə-xorlar damağında

-evlərindən qaçıblar,işdilər.bərnamə, ha ha haay

şüşəki salsın bizi görən insanlar, bülvarlar...

umudlanmayaq yaxşı olacağına hər nəyin

istərsə laxtalansın yaşam

ağarmasın, yaşarmasın ,saralmasın ağaclar

gömülsün torpağa kitablar,şerlər,şüarlar

itsin qarnımızın qurultusunda inançlar

mən nəm haranın solçusu sosiyalisti nəm haranın türkçüsü nasiyonalisti

qaçqınlar...ist olanmazlar

istlərsə qaçanmazlar

təki susmaq var hər nəyə qarşı və inanmamaq və bağırmamaq

örnəyi ?!yenilmiş bir ağac altında gəl

sayaq narin narin gözlərimizdə yağmuru damla damla

-türk dilində neçə yağmur mahnısı var ?

yumaq gözlərimizi hərnəyə

hamısını birdən söyləyək