مایاللاق 

 :: آیاق یالین

قوشباز اولاندان بری، هئچ اؤزگه­لره قازدیغین قویولارا دوشونمورسن. ائله هئی اللرینی آلنینا قویوب، گؤیه زیلله­ییرسن گؤزلرینی. گؤیرچین­لرین نئجه مایاللاق وورماغینا دوشونورسن. گؤیرچین­لرین آرتیق گؤیده­دیر، لاپ بولودلارین یانیندا. هردن - بیردن بارماق­لارینی آغزینا سالیب، فیشقا چالیرسان. گؤزلرین سئوینجدن قاناد چالیر، قانادلانیر. بیر مایاللاق… ایکی مایاللاق… اوچ مایاللاق… دؤرد مایاللاق… بئش مایاللاق… هه لاپ آز قالیر گؤیون یئددینجی قاتینا یئتیشه­سن. یئنه ساییرسان مایاللاقلاری… آلتی مایاللاق… یئد… آیاغی­نین آلتی قاچیر. یئددینجی مایاللاق آغزیندا قالیر. یئددینجی مایاللاغی سن وورورسان. بیردن - بیره اؤزگه­لره قازدیغین قویویا تئپه­سی اوسته دوشورسن. باشین قویونون قارا پالچیغینا باتیر. قولاغینا، آغزینا، مایاللاقلانمیش گؤزونه بیر ده کی بئینینه پالچیق دولور.

ایندی قازدیغین قویویا فخر ائده بیلرسن. قویودا یاشایان قورباغالاردان دا قورولداماغی اؤیرنمه­یین یاخشی اولار. قوررر…! قوررر…! قوررر…! سن ده قورولدا!

داها گؤیرچین­لری­نین مایاللاغینی گؤرمه­یه­جک­سن. قوشبازلیغی­نین سونو چاتدی. ایندی بیر نئچه دلی باشینا داش سالاجاق، داشلار باشینا ده­یدیک­جه قویونون نه اولدوغونو حیس ائده­جکسن. اوچماق ایسته­سن ده قانادین اولمایاجاق، گیجه­له­جک­سن. قویونون هؤرولموش داشلارینا دیه­جک باشین. باشینا هاوا گله­جک، سفئهلییه­جک­سن. دلی ساندیغین آدام­لار، سفئهلییینه گوله­جک­لر. قازدیغین قویو دلی­لرین گولوش­لریله دولاجاق.

سن هله اؤزونه گلمه­یه­جک­سن. یاخشی­سی اودور کی دلی­لرین آتدیغی داشلاری، اوست- اوسته قویوب اؤزونو قویونون آغزینا یئتیره­سن. آما بو دؤنه داها قویو قازماغی باشیندان آتیب قوشبازلیغیندان دا ال چک. داها گلن دؤنه ده دلی­لر داش آتمایاجاقلار قویویا…

Mayallaq

::Ayaq Yalın

Quşbaz olandan bəri, heç özgələrə qazdığın quyulara düşünmürsən. Elə hey əllərini alnına qoyub, göyə zilləyirsən gözlərini. Göyərçinlərin necə mayallaq vurmağına düşünürsən. Göyərçinlərin artıq göydədir, lap buludların yanında. Hərdən – birdən barmaqlarını ağzına salıb, fışqa çalırsan. Gözlərin sevincdən qanad çalır, qanadlanır. Bir mayallaq… iki mayallaq… üç mayallaq… dörd mayallaq… beş mayallaq… hə lap az qalır göyün yeddinci qatına yetişəsən. Yenə sayırsan mayallaqları… altı mayallaq… yed… ayağının altı qaçır. Yeddinci mayallaq ağzında qalır. Yeddinci mayallağı sən vurursan. Birdən – birə özgələrə qazdığın quyuya təpesi ustə düşürsən. Başın quyunun qara palçığına batır. Qulağına, ağzına, mayallaqlanmış gözünə bir də ki beyninə palçıq dolur.

İndi qazdığın quyuya fəxr edə bilərsən. Quyuda yaşayan qurbağalardan da quruldamağı öyrənəməyin yaxşı olar. Qurrr…! qurrr…! qurrr…! sən də qurulda!

Daha göyərçinlərinin mayallağını görməyəcəksən. Quşbazlığının sonu çatdı. İndi bir neçə dəli başına daş salacaq, daşlar başına dəydikcə quyunun nə olduğunu hiss edəcəksən. Uçmaq istəsən də qanadın olmayacaq, gicələcəksən. Quyunun hörülmüş daşlarına dəyəcək başın. Başına hava gələcək, səfehliyəcəksən. Dəli sandığın adamlar, səfehliyinə güləcəklər. Qazdığın quyu dəlilərin gülüşlərilə dolacaq.

Sən hələ özünə gəlməyəcəksən. Yaxşısı odur kı dəlilərin atdığı daşları, üst- üstə qoyub özünü quyunun ağzına yetirəsən. Amma bu dönə daha quyu qazmağı başından atıb quşbazlığından da əl çək. Daha gələn dönə də dəlilər daş atmayacaqlar quyuya… 

پیتراقدا یئنی بیر امکداش

:: محمدرضا فریدی قوجابه­یلی

(1978 - موغان)

یازیلاری پاندول کیمی اوشاقلا بؤیوک ادبیاتی آراسیندا رقص ائتمکده­دیر. بلکه بو پاندولو، تبریز یونیوئرسیته سینین فیزیکا فاکولته­سیندن آلیب اؤیکولرینه باغلامیش.

شالاپوز

بولودلار یومرولاندیقجا، بیز ده یومرولانیردیق. بولودلار یاغدیقجا، بیز ده یاغیردیق. گورولداییب شیمشک چاخیردیلار. بیز ده گورولداییب شیمشک چاخیردیق. هر ایش گؤروردولرسه بیز ده گؤروردوک. بولودلار - سیزه اویونجاغیق­می، بیزیم ادامیزی چیخاردیرسیز؟- دئییردیلر. بیز - آللاه حاققی یوخ!- دئییب آنجاق گولرکن یئنه اداسینی چیخاردیردیق.

بیر دؤنه خیابان - نه قدر بورادا یاغیش یوخدور، سوسوموزدان اؤلدوک- دئییب اسنه­دی. دوستلاریم­لا بیرگه شالاپوزا گئتدیک. اورادا آوتوبوسا مینیب مالاپوزا گئتدیک. مالاپوز شاشقین و بیر یئره دولموش سولارین دوز اورتاسی­نین یانیندایدی. بینانین ایچینه گیردیک. باشماقلی بیر بوغو بورما کیشی اوردا دایانمیشدی. و- نه سوله نیرسیز بورادا- ایسته ییردی دییه، بیز- سیز تعطیل اولوبسوز؟- دئدیک.

بوغو بورما کیشی- تعطیل اولوب-اولماغیمیز سیزه نه؟!- دئدی. بیز- ائ آ او ائ ائ ائ آ آ…!- دئدیک. بوغو بورما کیشی- ایتیلین جهنمه! بو قدر ده ائ آ سالمایین!- دئدی. بیز بینادان چیخدیق.

باشقا بیر دوستوموز- نه ائدک- دئدی. من- بیز اؤزوموز یاغمالیییق- دئدیم. باشقا بیر دوستوموز دا- نه جور آخی اولا بیلر؟!- دئدی. من- بولودلارین بوتون اداسینی و نه جور یاغماسینی بیلیریک.- دئدیم.

خیابانا گئدیب سوسوزلوقدان اوره­یی کئچن قارا آسفالتین اوستونده دایاندیق. یومرولاندیق، گورولداییب شیمشک چاخدیق. یئنه ده یومرولاندیق، یئنه ده گورولداییب شیمشک چاخارکن بیردن - بیره یاغدیق.

قارا آسفالت یوخودان اویانیب سئوینرکن شاپ - شوپ سالدی. سونرا بیزه خیابانین سونونا قدر مینیک وئردی. دویونجاق کئفه باخدیق.

Pıtraqda yeni bir əməkdaş

:: Məhəmmədrza Fəridi Qocabəyli

(1978 – muğan)

Yazıları Pandol kimi uşaqla böyük ədəbiyyatı arasında rəqs etməkdədir. Bəlkə bu Pandolu, təbriz universitəsinin Fizika fakultəsindən alıb öykülərinə bağlamış.

Şalapoz

Buludlar yumrulandıqca, biz də yumrulanırdıq. Buludlar yağdıqca, biz də yağırdıq. Guruldayıb şimşək çaxırdılar. Biz də guruldayıb şimşək çaxırdıq. Hər iş görürdülərsə biz də görürdük. Buludlar- sizə oyuncağıqmı, bizim ədamızı çıxardırsız?- deyirdilər. Biz – allah haqqı yox!- deyib ancaq gülərkən yenə ədasını çıxardırdıq.

Bir dönə xiyaban- nə qədər burada yağış yoxdur, susumuzdan öldük- deyib əsnədi. Dostlarımla birgə Şalapoza getdik. Orada avtobusa minib Malapoza getdik. Malapoz şaşqın və bir yerə dolmuş suların düz ortasının yanındaydı. Binanın içinə girdik. Başmaqlı bir buğu burma kişi orda dayanmışdı. Və- nə sülənirsiz burada- istəyirdi diyə, biz- siz tətil olubsuz?- dedik.

Buğu burma kişi- tətil olub-olmağımız sizə nə?!- dedi. Biz- e a o e e e a a…!- dedik. Buğu burma kişi- itilin cəhənnəmə! Bu qədər də e a salmayın!- dedi. Biz binadan çıxdıq.

Başqa bir dostumuz- nə edək- dedi. Mən- biz özümüz yağmalıyıq- dedim. Başqa bir dostumuz da- nə cur axı ola bilər?!- dedi. Mən- buludların bütün ədasını və nə cur yağmasını bilirik.- dedim.

Xiyabana gedib susuzluqdan ürəyi keçən qara asfaltın üstündə dayandıq. Yumrulandıq, guruldayıb şimşək çaxdıq. Yenə də yumrulandıq, yenə də guruldayıb şimşək çaxarkən birdən – birə yağdıq.

Qara asfalt yuxudan oyanıb sevinərkən şap – şup saldı. Sonra bizə xiyabanın sonuna qədər minik verdi. Doyuncaq kefə baxdıq.

تئرورچولوق، آیاق یالین و اونون جان گودنلری

دونیادا باش وئرن تئرورلارا گؤره و تبریزلی نرگیزین هده - قورخولارینا اساسن، من آیاق یالین جنابلاری جان گودن توتماغا مجبور قالدیم.

تئرورچولوق ایلک دؤنه قابیلین، هابیله قارشی قیسقانمالاریندان باش وئردی. بورادا خئییر قووه ایله شر قووه­سی بیر – بیری­نین قارشیسیندا دایاندی. خئییر له شر بیر - بیرینی تئرور ائتمک ایسته­ییردیلر. بیری یاخشیلیق­لا او بیری­سینی تئرور ائتمک زوروندایدی بیری ده پیس­لیک­له. سونوندا شر قووه­سی خئییر قووه­سینه غالیب گلدی. هابیل تئرور اولدو، قابیل قالدی و قابیلین تؤرمه­لری تئرورچولوغا داوام ائتدیلر.

ایندی هر نه تئروردان تؤره­نیر. من تئرورلارا معروض قالماییم دییه، تئرور ائتمه­یی باجارمالییدیم، یوخسا اؤزوم تئرور اولاردیم. باجاردیم، گیزلینجه اونون - بونون دالی سوره سؤز بزه­دیم، قوندارما یاخشیلیق­لاریم­لا یاخشیلاری ایغفال ائدیب یاخشیلارین علئیهینه سیلاحلاندیردیم.

یئنه ده شر قووه­سی ایله بارلانان یاخشیلیق­لاریملا خئییر قووه­سین تئرور ائتدیم. تئرورچو اولوب قورخو یاراتدیم، قورخولارین ایچیندن یئنی تئرورچولار عمله گلدیلر.

ایندی دئمک اولار کی بیز هامیمیز بیر جور تئرورچو ساییلیریق. بیریمیزین الینده سیلاح، بیریمیزین الینده قلم، بیریمیزین اوره­یینده نیفرت، بیزیمیزین دیلینده ایفتیرا و تؤهمت… بئله - بئله ایشلر و داها سونرا اؤلدورمک و دیری قالماق.

من دوغوردان دا تئرورچو اولدوغوما ایندی اینانیرام و بو اینام­لا تئرور ائتمه­ییمه داوام ائدیرم، یوخسا من چوخدان تئرور اولموشدوم. سیز ده تئرورچولوغونوزا داوام ائدین، بو سیزلیک دئییل، بو بیزیم اولو بابامیزدان قالمیش رحمتلیک قابیلدن میراثدیر.

Terorçuluq, Ayaq Yalın və onun can güdənləri

Dünyada baş verən terorlara görə və təbrizli Nərgizin hədə - qorxularına əsasən, mən Ayaq Yalın cənabları can güdən tutmağa məcbur qaldım.

Terorçuluq ilk dönə qabilin, habilə qarşı qısqanmalarından baş verdi. Burada xeyir qüvvə ilə şər qüvvəsi bir – birinin qarşısında dayandı. Xeyirlə şər bir – birini teror etmək istəyirdilər. Biri yaxşılıqla o birisini teror etmək zorundaydı biri də pisliklə. sonunda şər qüvvəsi xeyir qüvvəsinə ğalib gəldi. habil teror oldu, Qabil qaldı və qabilin törəmələri terorçuluğa davam etdilər.

İndi hər nə terordan törənir. Mən terorlara məruz qalmayım diyə, teror etməyi bacarmalıydım, yoxsa özüm teror olardım. Bacardım, gizlincə onun – bunun dalı sürə söz bəzədim, qondarma yaxşılıqlarımla yaxşıları iğfal edib yaxşıların əleyhinə silahlandırdım.

 Yenə də şər qüvvəsi ilə barlanan yaxşılıqlarımla xeyir qüvvəsin teror etdim. Terorçu olub  qorxu yaratdim, qorxuların içindən yeni terorçular əmələ gəldilər.

İndi demək olar kı biz hamımız bir cur terorçu sayılırıq. Birimizin əlində silah, birimizin əlində qələm, birimizin ürəyində nifrət, bizimizin dilində iftira və töhmət… belə - belə işlər və daha sonra öldürmək və diri qalmaq.

Mən doğurdan da terorçu olduğuma indi inanıram və bu inamla teror etməyimə davam edirəm, Yoxsa mən çoxdan teror olmuşdum. Siz də terorçuluğunuza davam edin, bu sizlik deyil, bu bizim olu babamızdan qalmış rəhmətlik qabildən mirasdır.

  دومان اردم

گونئی شعیری و پئپسی آچان لومپنیست­لر

گونئیده اوخوجو، شعری اوخومازدان اول اونون شاعیری­نین هانسی سیاسی دوشونجه­نی داشیدیغینی اؤیرنمه­یه ماراقلانیر {من اوخوجو سؤزونو، دونیانین بو خریطه­سینده ادبیاتچی­لار و بعضی ژورنالیست جمعیتییله عئینی توتورام. چونکو بورادا  اوخوجو دئیه بیر شئی یوخدور. آذربایجانلییا اوخوماغین، صنعتین،(چؤرکدن باشقا هئچ بیر شئیین) آکتواللیغی یوخدور}  آذربایجان شعری دئیلنده  بورادا هامی نین فیکریندن وطن، یاساقلانمیش دیل، تاریخ بویو فاشیست­لرین تجاووزونا معروض قالان بیر پارچا توپراق کئچیر، گونئیین بئلنچی سیاسی دوروموندا بونلار هامیسی طبیعی گؤرونمه­لی­دیر، آنجاق ادبییاتیمیز دا، بو وضعیتدن تاثیرسیز قالمیر کی هئچ، بلکه بوتون قاباریقلار ادبیاتدا اؤزونو گؤزه سوخور. مثلا توکتیم(مصرف) تاریخ­لری کئچن سییاستچی­لر  سیاست دونیاسیندان قووولاندان سونرا اؤز کورسولرینی ادبیاتدا حاضیر گؤرورلر(البتده ژورنالیست قاقاشلاریمیزین دا ایلتیفاتی آز اولمور). بو سیاستچی شعربازلار آتموسفئرین سیاسی و علمی بولانیقلیغیندان هابئله خالقین آذربایجانلیلیغیندان، ساوادسیزلیغیندان، ایستیبداد سئورلیییندن، قهرمانبازلیغیندان، بدبختلیییندن اخلاق­گرالیغیندان یاخشیجا اؤز منافعلری اوغروندا ایستیفاده ائتمه­یی باجاریرلار، توی مجلیس­لرینده، چایخانالاردا، یونیوئرسیته­لرده (بوراسی لاپ تأسوفلودور) قوشما ،گرایلی، محرملیک گئجه­لرینده شاخسئی صفلرینده مرثیه  اوخویوب ادبی، درنکلرده ایسه اؤزلرینی سربت  (بعضن ده اوتانمازجاسینا حددی آشیب مودئرن) شعرین بایراغی، زیروه­سی،نم هاراسی کیمی بو عونوانلارلا آدلاندیریرلار.

  سؤز درنک، مراسیم قدر اولاندا هئچ ده اوزوجو اولمور، چونکو بئله جمعیت­لر مکتوبلاشمایانا قدر قارین یئلی کیمی بیر شئی­دیر، اساس سؤز کؤهنه بئیین شعربازلاری گونئیین مودئرن شعری دئیه تانیتدیران، رئکلاملایان، چؤرک بورجو وئرن، پئپسی آچان لومپنیست بیر جریاندان گئدیر. 

  بو لوپمن جمعیتی بوتون ادبی ژورنال­لاری، سایت­لاری، ائفیرلری، نشریات­لاری(فارس شووونیستی­نین تضییق­لرینه گؤره اوسته­لیک بارماق ساییسیندان آزدیرلار) آلیب باشلارینا چئویریرلر. لومپن­لره گؤره «باشقا»سی دوشمن­دیر، بیزدن اولمایان دوشمن­دیر، دوشمن اولمامالی­دیر، اؤنم­لی اولان ادبیات دئییل، ادبیاتدا اؤز مؤوقئعلری­دیر، شؤهرت­لری و ساختا حؤرمت­لری­دیر، لومپن­لرین اکثریتی اورتا یاشلی اولدوغو اوچون گنج­لر دوشمان ساییلیر، چونکو اونلارین باخیشیندا، شعر، ساواد، دوشونجه، وطن­سئورلیک، تکجه اؤزلرینده معنا تاپیر، گنج نسیل اخلاق­سیز و آنارخیست­دیر، بو اوزدن، اوزده اینسانلیقدان صؤحبت ائلیین، و «گنج لراومودوموزدور» دئین لومپن­لر آرخادا گنجه، باشقاسینا اؤلوم کونسئپسیاسینی باغیریرلار. بونلاری تنقید ائدن لری ساتقین.سولچو.آنتی آذربایجان و گؤزلرینی یوموب آغیزلارینی آچیب به-به.چه-چه دئینلری ایسه اصیل وطن پرست انسانلار تقدیم ائدیرلر 

  نه قدرکی بو لومپن­لر گونئی شعری­نین بو پیس وضعیتینی گؤرمه­ییب  بونجا بوشو -بوشونا تعریف ائدیرلرسه، و بو جیزماقارالارینی مودئرن شعریمیزین سیمگه­سی اولاراق اونون - بونو باشینا چالیرلار، آذربایجان تاریخ بویو اولدوغو کیمی شعرین یانیندا اوزو قارالیغینا داوام ائده­جک. 

  کؤنده­لن سؤزلر (2)

:: آیاق یالین 

  &-- اؤلونو اؤز باشینا بوشلاسان، دوروب قاچار. 

  &-- آتی آتین یانینا باغلاسان، بیر ـ بیرینه باخار. 

  &-- داغ داغا یئتیشر، کال آدام یئتیشمز. 

  &-- داغ داغا یئتیشمه­سه  ده، آدام آداما شیللاق آتار. 

  &-- قارا قازان آغ قازانا دئییر، باشینا خئییر. 

  &-- یومورتادان یون قیرخاندا، قویونلار قیسقاندی. 

  &-- قدمعلی آرازی کئچه بیلمه­دی، آرازی داشلادیلار. 

  &-- واخت­سیز بانلایان خوروزون، کئفی ساز اولار. 

  &-- تویوق یاتیب یوخوسوندا، چیل - چیل خوروز گؤرر. 

  &-- دره یییه­سیز، نه ایش گؤرورسن گؤر! 

Köndələn sözlər (2)

&-- Ölünü öz başına boşlasan, durub qaçar.

&-- Atı atın yanına bağlasan, bir _ birinə baxar.

&-- Dağ dağa yetişər, kal adam yetişməz.

&-- Dağ dağa yetişməsə də, adam adama şıllaq atar.

&-- Qara qazan ağ qazana deyir, başına xeyir.

&-- Yumurtadan yün qırxanda, qoyunlar qısqandı.

&-- Qədəməli arazı keçə bilmədi, arazı daşladılar.

&-- Vaxtsız banlayan xoruzun, kefi saz olar.

&-- Toyuq yatıb yuxusunda, çıl – çıl xoruz görər.

&-- Dərə yiyəsiz, nə iş görürsən gör!

«عمران صلاحی­»دن چاپ اولمایان بیر یازی

:: قوندارما باهار

:: فارسجادان چئویرن:

یالنیز بیر وورغون وورلموش

:: دومان اردم

(…)

2924ـ ده،سویوق بیر قیش سحرینده

ایلخیچینین*سوغان زمی­لرینده، تئلئکابینده

جینایت اولاجاق!

بیریسی آرخادان سؤکه­جک دوستونو آلتی دنده­لی بیچاقلا

لیدئرلر بیر ـ بیر قینقیدیلاجاق تئریبون­لاردا

ژورنالیست­لر تیلیت قان اولاجاق گئجه­لر حامامدا

سونرا قادینلارینا تجاووز اولوناجاق

تجاووزکی…

کؤرپو آلتلاریندا بولوناجاق،ماغارلاردا

اؤیرنجی قیزلارین مئییتی

چیریل ـ چیپلاق

قاتیل منم!

سئیید محمد آغا اوجاغیندا زرنیشان خالا

بارناوادا قیسیر قادینلارا

ایبرانی خطله دوعا یازان ائرمنی قوجا

خیمیر ـ خیمیر آنلاتدیلار منه،

هره­سی بیر قولاغیما

اوجاق باشیندا

آتامدا قوربان قانیندان چکدی آلنیما

2008ـ ین سویوق بیر قیش گئجه­سینده

رامین جاهانگیرزاده ایله پلانلاشدیردیق

جینایتی مئساجئرده

هر شئیی ده گؤزه آلدیق

بالالاریم،دوستلاریم،قوهوملاریم

اؤلدوره­جکلریمین سییاهی­سینده

اولا دا بیلرسینیز

اولا بیلمزسینیز ده

بیرده کومیسئر آغالار

اییرنسم ده پولیس خایلاغیندان

دوزو یئییب سیندیرسانیز دا دوزدانی

یاخشیلیغیم سیزه ایش آچماقدیر حیاتدا

بالالارینیزین خطیرینه

اؤلدوره­جکلریمین آدلارینی

چت آرخیویمده ساخلامیشام بیر ـ بیر

(az_literature@yahoo.com)

تله سین قورتارماغا

2924ـ ده جینایت اولجاق آ،دئمه­یین کی دئمه دی

مقتول منم

(…)

:: Duman Ərdəm

2924də,soyuq bir qış səhərində

ilxıçının*soğan zəmilərində, telekabində

cinayət olacaq!

birisi arxadan sökəcək dostunu altı dəndəli bıçaqla

liderlər bir-bir qınqıdılacaq teribunlarda

jurnalistlər tilit qan olacaq gecələr hamamda

sonra qadınlarına təcavuz olunacaq

təcavüzki...

körpü altlarında bulunacaq,mağarlarda

öyrənci qızların meyiti

çırıl-çıplaq

qatil mənəm!

seyid məmməd ağa ocağında zərnişan xala

barnavada qısır qadınlara

ibrani xətlə dua yazan erməni qoca

xımır-xımır anlatdılar mənə,

hərəsi bir qulağıma

ocaq başında

atamda qurban qanından çəkdi alnıma

2008ın soyuq bir qış gecəsində

ramin cahangirzadə ilə planlaşdırdıq

cinayəti messagerdə

hər şeyidə gözə aldıq

balalarım,dostlarım,qohumlarım

öldürəcəklərimin siyahisində

olada bilərsiniz

ola bilməzsinizdə

birdə komiser ağalar

iyrənsəmdə polis xaylağından

duzu yeyib sındırsanızda duzdanı

yaxşılığım sizə iş açmaqdır həyatda

balalarınızın xətirinə

öldürəcəklərimin adlarını

chat arxivimdə saxlamışam bir-bir

(az_literature@yahoo.com)

tələsin qurtarmağa

2924də cinayət olcaq a,deməyinki demədi

məqtul mənəm

بیر بادام بیر قوز

:: آیاق یالین

نه قدر زور وئرسن ده سئومه­یه گوجون اولماسا، گیجه لیب یئره ده­یرسن. باشینا داش سالسالار دا سئویرسنسه سئو. سئوگی­نین نه اولدوغونو آنلاماغا چالیشسان دا، آنلایا بیلمیه­جکسن چالیشما! بانلایانلارین سایی آنلایانلاردان چوخ اولسا دا، سن هله لیک بانلاما. خوروزلانماغا هله تلسمه. خوروز قووروغونو گؤسترمکله سئوگینی قازانا بیلمزسن. قارا اولدوقلارینا گؤره قازانلارا تؤهمت وورما. ائهمال - ائهمال یئریسن ده دایانما، یئری. یئریکله­ینده ده تورشویا موراببا قاتیب یئمه. قاتماقاریشیق یوللاردان گئدنده اؤزوندن موغایات اول. میغمیغالار کیچیک اولسالار دا، آدامین دده­سینی یاندیریرلار. یانیرسان یان، کول اولورسان اول. کول آدامینا دؤنورسن دؤن. کوللاردا گیزلنن کاللاردان قاچ قورتار. قاتار گله جک. سسی دوشه­جک بئینینه. کپنکلر قاچاقچیسی اولان دوستون سنه ال قوزایاندا بیر بادام بیر قوز یادینا دوشسون.

Bir badam bir qoz

:: Ayaq Yalın

Nə qədər zor versən də sevməyə gücün olmasa, gicəlib yerə dəyərsən. Başına daş salsalar da sevirsənsə sev. Sevginin nə olduğunu anlamağa çalışsan da, anlaya bilməyəcəksən çalışma! Banlayanların sayı anlayanlardan çox olsa da, sən hələlik banlama. Xoruzlanmağa hələ tələsmə. Xoruz qouruğunu göstərməklə sevgini qazana bilməzsən. Qara olduqlarına görə qazanlara töhmət vurma. Ehmal – ehmal yerisən də dayanma, yeri. Yerikləyəndə də turşuya murabba qatıb yemə. Qatmaqarışıq yollardan gedəndə özündən muğayat ol. Mığmığalar kiçik olsalar da, adamın dədəsini yandırırlar. Yanırsan yan, kül olursan ol. Kül adamına dönürsən dön. Kollardan gizlənən kallarda qaç qurtar. Qatar gələcək. Səsi düşəcək beyninə. Kəpənəklər qaçaqçısı olan dostun sənə əl qozayanda bir badam bir qoz yadına düşsü. 

آدام ـ مادام اییسی گلیر

:: ظاهیر عظمت

بوتون گونو کوچه­ده وئییلله­نیرم

بیری سالام وئرمیر

بیری اؤل دئمیر

بیری قال دئمیر

ساغ اول دئمیر بیری

ائله بیل دیری - دیری

تورپاغا میسمارلانمیش مئییدم

آما بو

یالنیز گوندوزلر بئله­دیر

گئجه­لر ایسه دیرچه­لیرم عمللیجه

اووا چیخیرام

پارکلاردا تنها گزیشن

دردلی آداملارین باشینا آغاجلا ضربه ائندیریب

چیینیمه آتیب ائوه گتیریرم

بیرینجی ایشیم اونلارین چیرکلی جورابلارینی سویوندورماق

و آیاقلارینی یوماق اولور

زهلم گئدیر اییلنمیش آیاقلاردان

هه... سونرا قالان پالتارلاری چیخاردیرام

واننایا سالیب یاخشیجا چیمیزدیریرم مئییدی

سلیقیله دوغراییب سویودوجویا ییغیرام

10- 15 گون کئفه باخیرام

او قدر آجگؤز دئییلم کی

گونده بیرینی بیشیریب یئیم

اصلینده من پیس ایش گؤرمورم

چیخیلمازا دوشن

سواللارینا جاواب تاپمایان اینسانلاری

بیر جهدله خیلاص ائدیرمسه

بوردا پیس نه وار کی...

منیم وارلی

و هر شئیدن راضی آداملاردان خوشوم گلمز

منیمکی کاسیبلار و پروبلئملی آداملاردی

اوسته لیک کاسیبلارین وارلیلاردان

قات - قات چوخ اولدوغو بیر اؤلکه ده-

دئمه­لی هله مین ایل ده فیراوان یاشایا بیلرم

بو دا تئلئفون نؤمرم: 25-09-625-055

حیاتیندان بئزنلر موراجیعت ائده بیلر

:: ربیقه ناظیم قیزی

::شعرلر