لطفن چيغيرين مني 

  :: رامین جهانگیرزاده

  بيردن بيره، بورودو ببکلريمي بيره­لر. 

  قارانليق يئريدي، يورودو جانيما،  

  ايچدي قورتوم ـ قورتوم قانيمي 

  - لطفن ايچمه­یين مني!-دئديم. 

  قولاغيما قوندولار 

  قارا قانادلي قارا قانلي قارغالار. 

  سيچديلار قزئتلري 

  سيچديلار تئلئ کاناللاري 

  سيچديلار خيش ـ خيشلاري 

  سيچديلار پارازئتلري 

  سيچديلار قولاغيما 

  دولدوردولار سس خزينه­مي! 

  ـ بورنونوزو توتمايين، 

  لطفن تميزله­یين

  پوخ ـ پوسورلردن قولاغيمي!-دئديم. 

  ايلان شورباسي يئييرلر 

  ايچيرلر تولکو قانيلا دوزلميش، 

  يئددي ايلليک شرابي. 

  کئفله­نيرلر تولکو ساياق 

  کئفله­نيرلر مني 

  کيفيريم چيخدي 

  کئفيمي سوروشمايين 

  - لطفن کئفلنمه­یين مني!-دئديم. 

  شيشه چکيرلر! 

  اتيمي شيشه چکيرلر 

  چيغيرما بيشيريرلر مندن 

  چيغيرما دئييرلر منه 

  ديشلرينه چکيرلر 

  ديشلرينده چيغيرا بيلميرم! 

  ـ لطفن چيغيرين مني!ـ دئديم. 

  باخديم، 

  باخارکن باتديم باتيلقانلارا. 

  پوققولداديم 

  نفسيمه دولدو زيغزيمريق 

  فرياديم قارا زيغلاردا 

  قارا پوققولتو اولدو 

  باتديم…! 

  باتديم…! 

  اللريمي چيخارتديم…! 

  يئنه ده باتديم…! 

  -لوطفـ…!- دئديم،  

  ياريدا قالدي سسيم! 

  قالانين دئيه بيلمه­ديم! 

  پوققولداديم…! 

Qarğaların səsi

Mahnıların səsinə qarışanda

Nə baş verdiyini dəlilər anlayır

Anlamsız həyatda

Dəlilər ən anlamlı adamlar olur

Dəlilər səsləri bir-brindən ayıra blirlər

Səslər ayrılır dəlilərin ağzından

Dəlilr

Səslərin ağına bozuna baxmırlar

Ağ səslər

Boz səslər

Bunların heç biri önəmli deyil

Dəlilər üçun

Bir az oyanlıq

Dəlləklər ağ dəliklərdən

Bozarırlar

Bazarın səsi qaradır

Adamların

qulağını

Gözünü

tutur qara səslər

sabah yerlərini

taxtlarını tutacaqlar

qara həvəslər

dəlilərin həvəsi

dəlilərin səsidir

sabah dəlilər qusacaqlar

qaraların həvəsini

qarğaların səsini

رسام: جعفر روشندلی

آنا دیلی

  باراک و بارات 

  کربلايي بوشون آت چاپما دؤوراني باشا چاتدي. ايندي بؤرکسوز حاجي باراک سونجوق آتان بوز ائششه­یينه مينيب بيزيم بو کاتتا باراتي ياخيندان گؤرمک ايسته­يير. بو يازيق باراک بيلميرکي بو بارات هانسي يووانين قوشودور. بيلسئيدي هئچ کاتتانين آديني دا ديلينه گتيرمزدي. باراتين الينه دوشن سالامات قورتارماز. گؤرونور شير اوره­یي وار بو باراکدا!

نه اولور اولسون آنجاق باراتلا آغيز آغيزا قويماق اولماز. آدامين نکوارين شوخوملايار. ياخشي ياديمدادي، ائله کئچن ايل بو واختلار ايدي، يازيق البرادعيني ائله اويناتدي کي، سينديرا سينديرا سينديرين قيزلار دئيه­رک باش گؤتوروب گئتدي. او بيلميرکي بو کندين آداملاري دا، کاتتانين اليندن زارا گلیب دلی  اولوبلار آرتیق. بيريسي تئللايي چالير، بيريسي چال اويناسين بارات عمي دئيير، بيريسي چال اويناسين اژدر جکسون دئيير. خيلاصه هامي بير هاوا چالير. کیمین هاواسی گلمه­سه ده، بارات اونو  هاوالاندیریر.

کاتتانین سوفره­سی کند آداملارینا آچیق اولماسا دا، بوتون تانینمایان کندلرین آداملارینین اوزونه آچیقدیر. آنجاق هر کندین یوخ...! بلکه اوستو آچیق کندلرین اوزونه آچیقدیر نه اوستو اؤرتولو کندلرین!       

  کاتتا باراتين کاتتاليغيندان آز قالسا دا، او هله ده اؤز ايشيني گؤرور و گؤره جک ده! قوش مجيد اولماسايدي ايندي او چوخدان محو اولموشدو. قوش مجيد اونون ساغ الي اولدوغونا هئچ کيمين شوبهه­سي يوخدور. او اوزرليک­لري قالاقلارين باشينا قويماسايدي، ايندي کاتتايا چوخدان گؤز ديميشدي.    

  منجه حاجي باراک گؤروشمکدن واز کئچسين گرک. اونسوزدا دانيشيق يولو ايله هئچ بير ايش گؤره بيلمه­يه­جک. بیلسه­ ده بورنوندان گتیره­جک کاتتا بارات. من بو اوستو آچیق کندین بیر آدامی کیمی بو بایاتیلا باراکی کاتتادان اوزاق گزمه­یینی مصلحت گؤرورم.

باش اوسته باش دایانار

داش اوسته داش دایانار

سوغان سویماسین باراک

گؤزونده یاش دایانار

ایمضاء: آیاق یالین سؤزآتانلی

ايت اولماغين

باشقا عالمي وار

:: رامين جهانگيرزاده

باشلاندي اويون!

سؤز گولشديره­جکلر

سؤز صاحیبلري

صاحیب چيخاجاقلار بيزه!

ايت اولاجاييق

هوره­جه­یيک

ياليميز کسيلمه­سين دئيه

بوللاياجاييق قويروغوموزو

يييه­ميز اولاجاق

کسيلمه­یه­جک ياليميز

هورمه­یي ده ياددان چيخارداجاييق

ياددان چيخاجاق هر نه

بو گئجه

آي ايشيغيندا ياتیب

آيا

گئجه­يه

اولدوزلارا

هورمک ايسته­ديم

آنجاق هوره بيلمه­ديم

شؤنگودوم آي ايشيغيندا

گؤزلريمه دولدو آي ايشيغي

کوچوکله­دي ياشلار

داملا داملا ياناغيمدان

اولدوزلار سايريشاندا

گئجه ايشيق چيله­ينده

آي ايشيق ساچاندا

ايت اولماغين باشقا عالمي وار

سوموکلريمده شينقيلين­قوز اويناييرلار

:: آیاق یالین

بوتون قهرمانلار

بوتون فيلوسوفلار

بوتون شاعيرلر

بوتون اينسانلار

بئينيمه ييغيشيبلار

سوفره ساليبلار اؤزلري اوچون

يئييب ايچيرلر

ايسته­ديکلري یئری بولاييرلار

ايسته­ديکلري ايشلري گؤرورلر

تکي من يوخام

بير درييم بير سوموک

دريمه سامان تپيب

هر نه ائديرلر

سوموکلريمده شينقيلينقوز اويناييرلار

بير آن مني راحات بوراخسالار

کنديميزين باش باغچاسيندا

ائله راحات دولانارام کي

هئچ ياديما دا دوشمزلر

نه اونلارين ايت بوغوشدورماغيني گؤررم

نه دونیانی قاتیب - قاریشدیرمالارینی

sümüklərimdə şinqilinqoz oynayırlar

:: Ayaq yalın

Bütün qəhrəmanlar

bütün filosoflar

bütün şairlər

bütün insanlar

beynimə yığışıblar

süfrə salıblar özləri üçün

yeyib içirlər

istədikləri yeri bulayırlar

istədikləri işləri görürlər

təki mən yoxam

bir dəriyəm bir sümük

dərim saman təpib

hər nə edirlər

sümüklərimdə şinqilinqoz oynayırlar

bir an məni rahat buraxsalar

kəndimizin baş bağçasında

elə rahat dolanaram kı

heç yadıma da düşməzlər

nə onların it boğuşdurmağını görərəm

nə dünyanı atıb qatışdırmalarını

صاباح هاوا گیجه­له­جک

:: رامین جهانگیرزاده

…:ـ

بارماقلارینی سوروب

توتدو هاوایا…

سونرا

فیرلاندی…

فیرلاندی…

فیرلان…

فیرلا…

قیر…

فی…

فـ…

گیجلدی

ـ صاباح هاوا

گیجه­له­جک – دئدی

ها…! ها…! ها…!

***

…:-

قاییرما دیشلرینی چیخارتدی

کاساداکی سویون ایچینه آتدی

فیرلاتدی…

فیرلات…

فیرلا…

فیر…

فی…

فـ…

دیرچلدی…

- قاییرما دیشلریم

بوی آتیب دیرچه­له­جک ـ دئدی.

هو! هو! هو!

***

(یامانلاما منی

عزیز اوخوجو

لطفن…!

هئچ نه­یی توخومورام

ساریمامیشام سیزی ده

من ده ساریلمیشام

گؤره­سن قورتاراجاغاممی

بو دلی شاعیرلردن؟!!…)

***

ـ شاعیر منیم ده بیر شعریم وار

اووجومون ایچینده­دیر

باخ­خ­خ­…!

گل یاخیناااا!

 اوخویوم سنین اوچون

بیر نئچه میصراع

میصراع…

میصراع…

میصر…

میص…

می…

مـ…

هی! هی! هی!

قورخما…!

اووجومون ایچینده­کی

شعر دئییل شاعیر!

قاریشقادیر

آتا ـ آناسینی آختاریر

آغلاما منیم قارا قاریشقام!

گئدک باشقا یئره

بو شاعیر گیجه­لیب

اؤزونو تاپا بیلمیر هله…!

باديمجان 

:: سؤر آتان

  آي آمان آللاه يئنه بير جان گلير 

  جان جان ائدير الده باديمجان گلير

  قاچ قوتار اوغلان جانيني قاچ قوتار 

  يوخسا جانينا او باديمجان باتار 

  قالما دوشرسن يئنه قالماقالا 

  قالسا ايجينده او باديمجان بالا 

  سن ائله ظن ائتمه کي قالسان اَير 

  باشدان ائدرسن اونو سن بير تهر 

  يوخ قدئشئم يوخ سنه اولماز بئله 

  بئل بوخونون دوشسه گلرسن ديله 

  قاچ قوتار اوغلان بوراسي تهلوکه 

  قالما دوشرسن قاداسي پيس کؤکه

باخ بو سطيرلرده باديمجان گزر

شئلله­نه­نه شئلله­نه­نيب شئي دوزر

دوزمه اؤزوندن آ بالا بير سؤزو

يوخسا باديمجانلارين چيخار گؤزو

Badımcan

::Söz Atan

Ay aman allah yenə bir can gəlir

Can can edir əldə Badımcan gəlir

Qaç qutar oğlan canını qaç qutar

Yoxsa canına o Badımcan batar

Qalma düşərsən yenə qalmaqala

Qalsa ichində o Badımcan bala

Sən elə zənn etmə ki qalsan əyər

Başdan edərsən onu sən bir təhər

Yox qədeşem yox sənə olmaz belə

Bel buxunun düşsə gələrsən dilə

Qaç qutar oğlan burası təhlükə

Qalma düşərsən qadası pis kökə

Bax bu sətirlərdə Badımcan gəzər

Şellənənə şellənənib şey düzər

Düzmə özündən a bala bir sözü

Yoxsa Badımcanların çıxar gözü

بوراسی گونش کافه­سی!

:: آیاق یالین

های کوی سالمایین

کویلنمه­سین لاللار

گول – پیچ اویناماغا واختیمیز اولمادان

بورایا ییغیشمیشیق

اؤزوموزو ییغیشدیران اولمادی

سؤزوموزو ییغیشدیران هله آناسیندان اولماییب

قیزیل دیش قفه­چی،

آللاهین سسینی قاتیر بو های کویلره

کویلنمه­سین آللاه

فندکلر:

چاک!

چاک!

چاک!

چاک! ها چاک!

گوموشو میزلرین اوستونده

بارماقلاریمیز شاهیددیر

کول قابیلار حیاتیمیزی سایاقلاییر

دیوار ناحاق یئره آغزینی آچماییب اسنه­یرکن

ـ نارکامانلارین گیریشی یاساق!ـ دئمه­ییب کی!

دوزونو من لاپ قاریشدیرمیشام

رئال حیاتیملا سورئال حیاتیمی

ـ باغیشلایین فندیینیزی وئرین آلیشدیریم

بو قاتماقاریشیق یاشاییشیمی!

ـ بویورون! مومکون اولسا بیر گیله ده منه وئرین گیله­م!

دئمه­لی گولمه­یه­جک او کونجده ایلشن آغا!

ـ ها! ها! ها!

ـ سیرتیغین بیری سیرتیق!

ـ او کؤپک اوغلو کؤپک ده اؤزونو ساریییب!

مملکتین ایچینه آفتافا گؤتوروب!

ـ توالئته گئدیم بیر باش چکیم گلیم!

ـ تراختور هله قاباقدیر دآآش!

ـ آللاه صمد بهرنگی­یه رحمت ائله­سین!

ـ امامیه ده دونن بیر قیز اؤزونو یاندیردی!

ـ دوز دئییرسن؟!!

ـ اوچو مین تومن! آلان وارسا…!

ـ ائه بو آداملاردان باش آچا بیلمیرم!

ـ قولو آغزین تؤکولسون یئنه بیر قزئتی باغلادیلار!

ـ ساتقین!

ـ باغیشلا عزیز اوخوجو لاپ سنی اونوتموشدوم!

ایندی باشلاییم سنین اوچون بیر شعر یازماغا

بویور بودا او بیری شعرلره تای

تای با تای

بوراسی گونش کافه­سی

بوراسی رومانلا شعرین داوا دالاشی

بلکه ده آللاهسیزلارلا آللاهلیلارین باریشیغی

کمونیست قدئشلریمیز

بومبالاریلا پارتلاداجاقلار بورژوا سارایلارینی!

فرقینه دوشونورم بو تیلیفلی چایلارین…!

دئییرلر ارابه­لر بورادان کئچه­جک

هئچ بیر پروبلئم یوخ

هر نه دوزه­له­جک

ـ آغا چای ایچیرسیز؟!!

یوخ!

آمانین بیر گونودور

بیرده­نه ده ایچسم دونیانی پارتلادارام!

پالانیز قئییم دیر سه…

:: بابک زنوزی

بودا بیر دوستوموزون جاوابوندا

اوبیری سی یولداشلار گوذشت ائلللر.

پاه آتونان دانا قاریزماتیغین دا معناسین بولورموش سن؟

بس سن اوزون ائلیت سن ده ائله

عیبی یوخدور هر ائله ائله بیر ایت لازیم دیر

بورا سوز میدانی دیر

بورادا گئچیب آغناماخ لازیم دئگیل

توز سالما

آمما

سوز سال سان عیبی یوخدور

آنجاخ نه قه دَر آنقیرا بولورسن آنقیر

کیمسه نین سوزدئماغونا،

دئمه ماغونا،

نه جوردئماغونا

نییه دئماغونا

تکلیف تعیین ائله مه

نئجه کی اوبیری سی لر سیزه ائله میرلر

سیز او یئرده دئگیل سیز

آنجاخ اوز سوزونزی دئیین

یوکلری بیز بئلیمیزدن آشیردیخ

خوشوزگلیرسه

پالان قوشقونوز قئییم دیرسه

سیز یوکلرینیزی محکم ساخلایین

امما چالیشمایین کی اوبیری سینی یوک لویه سیز

هرکس ائلییه بولسه اوزی بولسون

>----------> قایناق

------------------------------------------------

آچیقلاما:

اوسته کی یازینی عزیز دوستوموز منیم یازدیغیم قاشیق و قاشیفچی­لار آدلی یازیمین جاوابیندا یازیب...! عزیز بابک دوستوموزا اوغورلار آرزیلایاراق اونون جاوابیندا آشاغیدا گتیردییم بو یازیم گؤرر…

سیچرادیم اؤزومه

    :: رامین جهانگیرزاده

  منه ایت آدی قویوب 

  هورمه­ییمی، 

  ائششک آدی قویوب 

  آنقیرماغیمی 

  خفتن قاپیب 

  سونجوق آتارکن  

  آنلاتدیلار 

  گؤیرتدیلر 

  سانجیلاتدیلار 

  قاپمادیم 

  سونجوق آتمادیم 

  گؤیرمه­دیم 

  قارنیما سانجی دولمادی 

  سیچرادیم اؤزومه 

  جیرماقلادیم اوزومو

----------------------------------

قایناق

يئني عصرين قارغيشلاري

 :: آیاق یالین

◊      بارماقلارين ات­دؤين ماشينين بيچاغينا ايليشسين.

◊      ايدز توتاسان سني.

◊      گؤزونه جوش دوشسون هئچ يئري گؤرمه­يه­سن.

◊      مئترودا قاتارا ميننده، مئترو باشينا اوچولسون.

◊      چکدييين چئکلرين قاييتسين، هئچ دولا بيلمه­يه­سن.

◊      ان سئودييين فيلمه باخاندا، تيلويزيونون يانسين، فيليم­سيز قالاسان.

◊       ساتینا يازي يوکله­ينده، هک اولسان اينشاءالله.

◊      موبايلينا ائله ويروس دوشسون، هئچ بير نومره­ني توتا بيلمه­يه­سن.

◊      ساعاتي­نين قارا عقربه­سي سينسين.

◊      يازديغين 100 صحيفه­ليك مودئرن شعرلرينه قارا جؤهر داغيلسين، كيتاب­سيز قالاسن.

◊      گؤروم سنين پاسپورتون يئرلي-ديبلي ايتسين، پاسپورتسيز قالاسان، هئچ يئره گئده بيلمه­يه­سن.

◊      بارماقلارين چوروسون، ايل - اون ايکي آي بير سطير ده يازاماغا تامارزي قالاسان.

◊      آکواريومونون شوشه­سي سينسين، باليقلارين جان وئرسين.

◊      پئژو ماشينين، آت آراباسي­نين آلتيندا قالسين.

◊      كامئرانين ديافراگمينا سيلينمه­ين لكه دوشسون.

◊      ائوينده­كي شومينه­نين ساخسي­لاري سينيق – سينيق اولسون.

◊      اوچ فاز برق توتسون سني.

◊      فئرده بيشن تويوغون يانيب كول اولسون.

◊      كافيشاپدا ايچديين تورك قهوه­­سي زهرين اولسون.

Yeni əsrin qarğışları